Վահան Բիչախչյանի և Եղիշե Մելիքյանի մամուլի ասուլիսը Հունգարիա-Հայաստան խաղից առաջ

2026թ․ աշխարհի առաջնության ընտրական փուլի Հունգարիայի դեմ խաղից առաջ, որը կկայանա հոկտեմբերի 11-ին Բուդապեշտում, Հայաստանի ազգային հավաքականի կիսապաշտպան Վահան Բիչախչյանը և գլխավոր մարզիչ Եղիշե Մելիքյանը կիսվեցին իրենց սպասելիքներով։ Ֆուտբոլիստը ընդգծեց թիմում տիրող հրաշալի մթնոլորտը և պատրաստակամությունը՝ պայքարելու արդյունքի համար, իսկ մարզիչը շեշտեց իր հավատը թիմի նկատմամբ՝ անկախ մրցակցի ուժից։

Վահան Բիչախչյան. «Մենք Բուդապեշտ ենք եկել դրական արդյունքի հասնելու համար»
«Հունգարիան ուժեղ թիմ է, և մեր խմբի բոլոր թիմերը բավական ուժեղ են, ինչը յուրաքանչյուր հանդիպումը մեզ համար շատ բարդ է դարձնում։ Թիմում մթնոլորտը հիանալի է, լավ մարզումներ ենք անցկացրել, բոլորը լավ մարզավիճակում են։ Մենք Բուդապեշտ ենք եկել՝ խաղադաշտում մեզնից կախված ամեն ինչ անելու և դրական արդյունքի հասնելու համար»։

Կիսապաշտպանը նշեց, որ թիմը լրջորեն է պատրաստվել․
«Լավ ուսումնասիրել ենք Հունգարիայի հավաքականը։ Մենք կկենտրոնանանք մեր խաղի վրա, ունենք մեր պլանը, և հուսով եմ՝ կկարողանանք այն իրականացնել։ Վստահ եմ, որ կպարտադրենք մեր խաղը և շատ խնդիրներ կստեղծենք մրցակցի համար»։

Բիչախչյանը առանձնահատուկ կարևորեց նոր գլխավոր մարզիչի գալուստը․
«Նոր մարզչի գալուց հետո թիմում մթնոլորտը փոխվեց դեպի լավը։ Եղիշե Մելիքյանը մեզ ավելորդ էներգիա և ինքնավստահություն տվեց։ Կարծում եմ՝ վաղը նույն մակարդակով կխաղանք, ինչպես Իռլանդիայի դեմ։ Իհարկե, մարզչին դեռ ժամանակ է պետք ամբողջությամբ մեր խաղային ոճը ձևավորելու համար, բայց նրա աշխատանքը արդեն իսկ տեսանելի է։ Հուսով եմ՝ միասին կհասնենք մեր նպատակներին»։

Եղիշե Մելիքյան. «Մենք ունենք մեկ նպատակ՝ հաջողություն»
Մարզիչից հարցրել են՝ ինչպես է թիմը պատրաստվում դիմակայել Հունգարիայի առաջատար Դոմինիկ Սոբոսլայն։

«Կասեմ այսպես․ մենք ունենք միայն մեկ նպատակ՝ հաջողություն, և այդ նպատակին հասնելու համար կանենք ամեն ինչ։ Լավ ուսումնասիրել ենք Սոբոսլային, նա շատ լավ խաղացող է և անպայման խնդիրներ կստեղծի մեզ համար, ինչպես նաև ամբողջ հունգարական թիմը։ Մեզ շատ ուժեղ թիմ է սպասում, իսկ քանի որ խաղը արտագնա է, դժվարությունը կրկնակի է լինելու՝ կլինի ճնշում, կլինեն խնդիրներ։ Բայց մենք լավ թիմ ունենք, հավատում ենք ինքներս մեզ, և վաղը կպայքարենք»։

Հունգարիայի բացակայող ֆուտբոլիստների մասին
«Այո, ուսումնասիրել ենք այդ հարցը, բայց ես բացակայողներին ուշադրություն չեմ դարձնում։ Մենք լավ ենք հասկանում թիմի փիլիսոփայությունը։ Հունգարիայի մարզիչը այնտեղ աշխատում է արդեն 7 տարի, իսկ ես թիմի ղեկին ընդամենը 7 ամիս եմ։ Դա նշանակում է, որ նա իր թիմը շատ լավ է ճանաչում և գիտի՝ ինչպես լավագույնս օգտագործել խաղացողներին։ Ես դեռ այդ առավելությունը չունեմ։ Բայց մի բան կա՝ ես մեծ հավատ ունեմ իմ թիմի նկատմամբ։ Անկախ նրանից, թե ինչպես կխաղա Մարկո Ռոսին, մեզ համար վաղվա խաղը միևնույն է շատ դժվար է լինելու։ Մենք պատրաստվում ենք ծանր մրցավեճի»։

Ոչ-ոքիի և հնարավոր անակնկալների մասին
«Այո, քանի որ խաղը արտագնա է և մրցակիցը ուժեղ է։ Ոչ-ոքը մեզ համար լավ արդյունք կլինի»։

Երբ հարցրեցին հնարավոր տակտիկական անակնկալների մասին, Մելիքյանը պատասխանեց․
«Այո, տնային խաղերում ես ուզում էի անակնկալներ պատրաստել։ Բայց արտագնա խաղերում ես ավելի շատ մտածում եմ այն մասին, թե ինչ անակնկալներ կարող է բերել մրցակիցը»։

Հայաստանի խնդիրների մասին
«Այո, կան խորքային խնդիրներ, բայց ես դեռ դրանց լուծումները չեմ գտել։ Դրանք գտնելու համար ավելի շատ ժամանակ է պետք, և միայն այդ ժամանակ կհայտարարեմ բոլոր խնդիրների և դրանց լուծումների մասին»։