Մամուլի ասուլիս Երևանում․ Հարությունյանի և Կուրգինյանի անկեղծ հայտարարությունները

Հայաստանի ազատ ոճի ըմբշամարտի հավաքականի գլխավոր մարզիչ Աբետնակ Կուրգինյանը և աշխարհի 2025 թվականի առաջնության բրոնզե մեդալակիր Արսեն Հարությունյանը մամուլի ասուլիսի ժամանակ Երևանում պատասխանեցին լրագրողների հարցերին։

Հիշեցնենք, որ Հայաստանի հավաքականը ավարտեց աշխարհի առաջնությունը մեկ մեդալով․ 57 կգ քաշային կարգում բրոնզե մեդալ նվաճեց 25-ամյա Հարությունյանը։ Զագրեբում նա տպավորիչ հաղթանակ տարավ մրցաշարի գլխավոր ֆավորիտի՝ օլիմպիական խաղերի փոխչեմպիոն Սփենսեր Լիի (ԱՄՆ) նկատմամբ, սակայն կիսաեզրափակչում զիջեց ԿԺԴՀ ներկայացուցչին։

«Ես այս մրցաշարին մոտեցել էի հրաշալի մարզավիճակում։ Կարելի է ասել՝ կարիերայիս լավագույն մարզավիճակում։ Ամեն ինչ իդեալական էր՝ քաշի նվազեցում, ֆիզիկական պատրաստվածություն, հոգեբանական տրամադրվածություն։ Շատ քիչ էր պետք չեմպիոն դառնալու համար, բայց ես շարունակելու եմ աշխատել ինձ վրա, որպեսզի մի օր դառնամ աշխարհի չեմպիոն։ Օլիմպիական խաղերը իմ գլխավոր երազանքն են, հենց այդ պատճառով էլ մնում եմ 57 կգ քաշային կարգում։ Արդեն Լոս Անջելես-2028-ից հետո պլանավորում եմ անցնել 65 կգ քաշային կարգի, եթե օլիմպիական քաշերը չփոխվեն։ Կարող եմ վստահ ասել՝ կարիերայիս գագաթնակետը դեռ առջևում է։ Մինչև 32 տարեկանը հաստատ կլինեմ գագաթնակետում, իսկ հետո կշարունակեմ մրցել այնքան, որքան կկարողանամ։ Շատ ուշադիր եմ հետևում սննդակարգիս և մարմնիս վիճակին, ունեմ բժիշկ և դիետոլոգ, որպեսզի երկարացնեմ սպորտային կարիերաս։ Այսպիսով՝ 2028 թվականի Օլիմպիադան չի լինի իմ վերջին հնարավորությունը», — նշեց Արսեն Հարությունյանը։

Հավաքականի գլխավոր մարզիչ Աբետնակ Կուրգինյանը շեշտեց, որ Հարությունյանը աշխարհի առաջնություններում շարունակելու է պայքարել 57 կգ քաշային կարգում, իսկ Եվրոպայի առաջնություններում և այլ մրցաշարերում՝ 61 կգ-ում։

Կուրգինյանը հավելեց նաև, որ մեծ հաջողություններ չէր սպասում ԱԱ-2025-ին․
«Հայաստանում այսօր քաշային կարգերում անհրաժեշտ մրցակցություն չկա։ Ազգային մեծահասակների առաջնությունը բավարար մասնակից չի հավաքում, հիմնականում հանդես են գալիս երիտասարդները։ Զագրեբ ես ցանկանում էի տանել միայն երեք ըմբիշի՝ Հարությունյանին, Թևանյանին և Անդրեասյանին։ Մնացածը դեռ պատրաստ չէին, բայց արդյունքում մեկնեցինք հինգ հոգով։ Մենք տեսնում ենք լուրջ խնդիրներ նաև որակյալ երիտասարդ մարզիչների թվի հետ կապված։ Պետք է աշխատենք այդ ուղղությամբ, որպեսզի երկրում արժանի մրցակցություն ունենանք, հակառակ դեպքում չենք զարգանա։ Այժմ ասիական երկրներն առաջատար դիրքերում են, իսկ այս պահին մեզ համար դժվար է մրցել նրանց հետ»։

Պատասխանելով հավաքականի հետագա ծրագրերին վերաբերող հարցին՝ Կուրգինյանը տեղեկացրեց, որ թիմը պատրաստվում է մինչև 23 տարեկանների աշխարհի առաջնությանը, որը կկայանա հոկտեմբերի կեսերին Սերբիայում․
«Մեր բյուջեն սպառվել է, և մենք դիմելու ենք պետությանը՝ լրացուցիչ ֆինանսավորում ստանալու համար, որպեսզի կարողանանք մասնակցել այդ մրցաշարին»։