Ջոն վան 'տ Սխիպի մամուլի ասուլիսը՝ Հայաստանի 1:6 հաշվով պարտությունից հետո Վրաստանին

Հայաստանի ազգային հավաքականի գլխավոր մարզիչ Ջոն վան 'տ Սխիպը լրագրողների հետ զրուցեց Թբիլիսիում Վրաստանի հավաքականից 1:6 խոշոր հաշվով պարտությունից հետո: Հոլանդացի մասնագետը մեկնաբանեց խաղը, թիմի իրավիճակը, ինչպես նաև կրկին անդրադարձավ Գրանտ-Լեոն Ռանոսի հեռանալու թեմային։

— Ինչն ազդեց նման արդյունքի վրա:

— Երբ սկսում ես խաղը մեր նման՝ 4-րդ րոպեին արագ գոլ բաց թողնելով, հետո երկրորդն ու երրորդը, կորցնելով գնդակը և անպատասխանատու խաղալով, այլ ելք չի կարող լինել։ Նախևառաջ, ցանկանում եմ ներողություն խնդրել հայ ժողովրդի առջև այս խաղի և արդյունքի համար։ Սա անընդունելի է։

— Վրաստանը այս երկու խաղերում xG 3.5 ուներ, բայց խփեց 9 գոլ, ինչո՞ւ:

— Սպասվող գոլերի (xG) ցուցանիշով Վրաստանը այս երկու խաղում 3.5 էր, բայց կարողացավ խփել 9 գոլ։ Սա մեր ֆուտբոլիստների անհատական սխալների հետևանքն էր։ Մենք փորձում էինք ստեղծել արհեստական խաղից դուրս վիճակ, բայց մեկ ֆուտբոլիստ միշտ հետ էր մնում։ Մենք կորցնում էինք գնդակը դաշտի կենտրոնում ու մեր կիսադաշտում։ Օրինակ՝ երբ Ստեփան սխալ փոխանցում կատարեց Նաիրին, և դրանից անմիջապես հետո գոլ խփվեց։ Վրաստանը ուժեղ թիմ է և դաժանորեն օգտվում է նման սխալներից։ Բացի այդ, վրացի ֆուտբոլիստները խաղում են ուժեղ լիգաներում բարձր մակարդակով, նրանք միաբանված թիմ են, մինչդեռ հայ խաղացողները հանդես են գալիս ավելի պակաս մրցակցային առաջնություններում և չկարողացան դրսևորել թիմային խաղ։ Որպես նոր մարզիչ, ես չէի կարող մի քանի օրվա ընթացքում վերացնել բոլոր սխալները։ Սակայն հուսով եմ, որ ապագայում մենք կսովորենք դրանից՝ թե՛ որպես թիմ, թե՛ որպես անհատական խաղացողներ։

— Հարց Ռանոսի մասին։ Հնարավո՞ր է, որ ձեր միջև թյուրըմբռնում էր։ Նա իր հայտարարության մեջ ասաց, որ դա գաղտնի զրույց էր, և դուք միասին որոշեցիք, որ նա պետք է վերադառնա ակումբ։

— Թյուրըմբռնում չի եղել։ Ռանոսը ուղիղ ասաց ինձ, որ եթե մեկնարկային կազմում չլինի, կվերադառնա «Կայզերսլաուտերն»։ Ես երբեք չեմ հանդիպել այնպիսի ֆուտբոլիստի, որը նման պայմաններ դնի։ Գուցե միայն Մեսսին կարող է իրեն դա թույլ տալ։ Ես նրան ասացի, որ նա մեկնարկային կազմում չէ, բայց կարող է խաղալ երկրորդ խաղակեսում։ Նա երիտասարդ է, և պետք է համբերատար սպասի իր շանսին։ Սակայն նա ցանկանում էր լինել միայն մեկնարկային կազմում։ Հաշվի առնելով, որ Ռանոսը երեք ամսվա ընթացքում ընդամենը 30 րոպե էր խաղացել, ես որոշեցի նրան պահել պահեստայինների նստարանին։ Ֆուտբոլիստը պետք է ամբողջությամբ նվիրվի իր երկրին՝ անկախ նրանից, թե քանի րոպե է խաղում։

— Հնարավո՞ր է, որ այս արդյունքը հետևանք է վատ մթնոլորտի հանդերձարանում։ Ի՞նչ տեսաք այս օրերին, իսկապե՞ս այդպես էր։

— Մարզումներին մթնոլորտը հիանալի էր։ Իհարկե, մարզումները և խաղերը տարբեր բաներ են, բայց հանդերձարանում ես ոչինչ չտեսա, ինչը կարող էր ցույց տալ վատ մթնոլորտ։ Մենք կաշխատենք մեր սխալների վրա և կշարժվենք առաջ։