Կառավարությունը շուրջ 144 միլիոն դրամ կհատկացնի՝ միջազգային մրցաշարերին մասնակցության և մարզիկների խրախուսման նպատակով

Կառավարության այսօրվա նիստում ընդունվել է որոշում՝ հավելյալ 143 միլիոն 979,8 հազար դրամ ուղղելու Հայաստանի սպորտի զարգացմանը։ Նպատակն է ապահովել ազգային հավաքականների լիարժեք մասնակցությունը միջազգային մրցաշարերին, ինչպես նաև խրախուսել բարձր արդյունքների հասած մարզիկներին և նրանց մարզիչներին։ Ֆինանսավորումը կտրամադրվի ԿԳՄՍ նախարարության 2025 թվականի պետական բյուջեի վերաբաշխման հաշվին։

Որոշման համաձայն՝ երեք մարզական ֆեդերացիաներ կստանան 44 միլիոն 801,7 հազար դրամի լրացուցիչ ֆինանսավորում՝ միջազգային առաջնություններին մասնակցելու և նախապատրաստական աշխատանքներ իրականացնելու համար․

• Հայաստանի ըմբշամարտի ֆեդերացիան՝ 26 միլիոն 864,3 հազար դրամ, Սերբիայի Նովի Սադ քաղաքում անցկացված մինչև 23 տարեկանների աշխարհի առաջնությանը մասնակցության համար։

• Հայաստանի բասկետբոլի ֆեդերացիան՝ 12 միլիոն 717,4 հազար դրամ, Սոֆիայում կայանալիք Եվրոպայի առաջնության (Եվրոբասկետ) ընտրական փուլի համար։

• Հայաստանի վոլեյբոլի ֆեդերացիան՝ 5 միլիոն 220 հազար դրամ, Վրաստանի Թելավի քաղաքում կայանալիք մինչև 18 տարեկան աղջիկների Եվրոպայի առաջնությանը մասնակցելու նպատակով։

Բացի այդ, 99 միլիոն 178 հազար դրամ կհատկացվի Օլիմպիական խաղերում, աշխարհի և Եվրոպայի առաջնություններում բարձր արդյունքներ գրանցած մարզիկներին և նրանց մարզիչներին անվանական թոշակների ձևով խրախուսելու համար՝ համաձայն ՀՀ կառավարության 2020 թվականի հուլիսի 2-ի թիվ 1096-Ն որոշման։