Հենրիխ Մխիթարյանի վնասվածքի վերաբերյալ նոր տեղեկատվություն է հայտնվել։

Միլանի «Ինտերի» կիսապաշտպան Հենրիխ Մխիթարյանը վնասվածք է ստացել Սերիա A-ի կենտրոնական հանդիպման առաջին կեսում՝ «Նապոլիի» դեմ։ 30-րդ րոպեին հայ ֆուտբոլիստը ձախ ազդրի հետևի մկանների խնդիր է ստացել այն դրվագում, երբ փորձեց կանգնեցնել Ջովանի Դի Լորենցոյի անցումը, որը հանգեցրեց նեապոլիտանցիների օգտին նշանակված պենալտիի։

Բախումից հետո Մխիթարյանը զգացել է սուր ցավ և չի կարողացել շարունակել խաղը։ Գլխավոր մարզիչ Սիմոնե Ինձագին ստիպված է եղել շուտ կատարել փոխարինում՝ 32-րդ րոպեին դաշտ դուրս բերելով Պյոտր Զելինսկիին։

Նախնական ախտորոշման համաձայն՝ կիսապաշտպանի մոտ խնդիր կա ձախ ազդրի ֆլեքսորների (ծալիչ մկանների) հետ։ Մոտակա ժամերին ֆուտբոլիստը կանցնի լրացուցիչ բժշկական հետազոտություններ, որոնք թույլ կտան պարզել վնասվածքի ճշգրիտ աստիճանը և վերականգնման ժամկետները։

Մխիթարյանի վնասվածքը լուրջ հարված է «Ինտերի» համար, քանի որ հայ կիսապաշտպանը ընթացիկ մրցաշրջանում թիմի հիմնական խաղացողներից մեկն է՝ աչքի ընկնելով կայունությամբ և փորձով խաղադաշտի կենտրոնում։ Ակումբում հուսով են, որ վնասվածքը լուրջ չի լինի, և ֆուտբոլիստը կկարողանա հնարավորինս շուտ վերադառնալ խաղադաշտ։

Առջևում «Ինտերին» սպասվում են խաղեր «Ֆիորենտինայի» և «Վերոնայի» դեմ Սերիա A-ում, ինչպես նաև «Կայրատի» դեմ՝ Չեմպիոնների լիգայում։ Այս հանդիպումները Մխիթարյանը, ամենայն հավանականությամբ, բաց կթողնի։