Պորտուգալիան կխաղա Հայաստանի դեմ Էյուզեբիոյին նվիրված յուրահատուկ մարզահագուստով

Պորտուգալիայի հավաքականը նոյեմբերի 16-ին Հայաստանի դեմ խաղում դուրս կգա եզակի սև-ոսկեգույն մարզահագուստով, որը ստեղծվել է ի պատիվ լեգենդար Էյուզեբիոյի՝ 1965 թվականի «Ոսկե գնդակի» առաջին պորտուգալացի դափնեկրի։ Նոր մարզահագուստը ներկայացրել են Պորտուգալիայի ֆուտբոլի ֆեդերացիան (FPF) և PUMA ընկերությունը՝ նշելով այս պատմական հաջողության 60-ամյակը։

Մարզահագուստը, որը կոչվում է Pantera Negra («Սև հովազ»), առանձնանում է էլեգանտ սև գույնով և ոսկեգույն շեշտադրումներով՝ խորհրդանշելով Էյուզեբիոյի մականունը և պորտուգալական ֆուտբոլի «ոսկե դարաշրջանը»։ Մարզաշապիկի հետևին գրված է «Pantera Negra», իսկ կրծքի և մեջքի հատվածում տեղադրված է 13 համարը՝ այն համարը, որով հանդես էր գալիս Էյուզեբիոն։ Ընդամենը կթողարկվի 1965 օրինակ՝ հիշեցնելով «Ոսկե գնդակի» շնորհման տարին։

«Էյուզեբիոն պարզապես ֆուտբոլիստ չէր՝ նա դարձավ Պորտուգալիայի կրքի և հպարտության խորհրդանիշ։ Մենք հպարտ ենք, որ կարողանում ենք հավերժացնել նրա ժառանգությունը այս նախագծով», — նշել է FPF-ի առևտրային բաժնի տնօրեն Ժուան Մադեյրուշ Կարդուզուն։

Այս հիշարժան մարզահագուստը կօգտագործվի միայն մեկ անգամ՝ Պորտուգալիա–Հայաստան խաղում, որը կանցկացվի Պորտոյում՝ Estádio do Dragão մարզադաշտում։

Հայաստանի հավաքականի համար այս հանդիպումը կարող է որոշիչ լինել։ Եթե Եղիշե Մելիքյանի թիմը նոյեմբերի 13-ին կարողանա հաղթել Հունգարիային, ապա վերջին տուրում Պորտուգալիայի դեմ այն կպայքարի աշխարհի 2026 թվականի առաջնության ուղեգրի համար։ Հակառակ դեպքում՝ խաղը կարող է կրել միայն խորհրդանշական բնույթ, հատկապես եթե Պորտուգալիան նույն օրը հաղթելով Իռլանդիային, ապահովի առաջին տեղը։

Խաղից մեկ օր առաջ՝ նոյեմբերի 15-ին, PUMA-ն Լիսաբոնում կհամարի հատուկ միջոցառում՝ նվիրված Էյուզեբիոյի հիշատակին, որտեղ կներկայացվեն հազվագյուտ արխիվային կադրեր, ցուցանմուշներ և կմասնակցեն հայտնի ֆուտբոլիստներ։