Պորտուգալացի Միգել Վելոզան դարձավ «Ուրարտուի» ֆուտբոլիստ

Պորտուգալացի վինգեր Միգել Վելոզան կշարունակի իր կարիերան Երևանի «Ուրարտու» ակումբում։ Այս մասին հայտնում է ինսայդեր Սուրեն Մելիքսեթյանը (MS_FootballPlus)։

Transfermarkt-ի տվյալներով՝ 25-ամյա ֆուտբոլիստը պայմանագիր է ստորագրել հայկական ակումբի հետ մինչև 2027 թվականի դեկտեմբեր։

Վելոզան «Բենֆիկայի» և «Սպորտինգի» ակադեմիաների սան է, սակայն իր պրոֆեսիոնալ կարիերայի մեծ մասը անցկացրել է Պորտուգալիայի և Չեխիայի երրորդ լիգաներում։ Ֆուտբոլիստի վերջին ակումբը «Կալդասն» էր, որը հանդես է գալիս Պորտուգալիայի երրորդ դիվիզիոնում։

Ընթացիկ մրցաշրջանում Վելոզան խփել է 3 գոլ՝ մասնակցելով 14 հանդիպման, իսկ նախորդ մրցաշրջանում իր ակտիվում ունեցել է 5 գոլ 31 խաղում։

Միգել Վելոզան կդառնա «Ուրարտուի» առաջին նորեկը ձմեռային տրանսֆերային պատուհանի ընթացքում։ Ռոբերտ Արզումանյանի գլխավորած թիմը շարունակում է պայքարը Հայաստանի Պրեմիեր լիգայի չեմպիոնության համար՝ զբաղեցնելով երկրորդ տեղը 29 միավորով և հինգ միավորով զիջելով առաջատար «Արարատ-Արմենիային»։