Ամառվա առաջին բարձրաձայն տրանսֆերը կայացավ․ «Ռեալը» ձեռք բերեց Դին Հեյսենին

Պաշտոնական է. Իսպանիայի ազգային հավաքականի և անգլիական «Բորնմութի» պաշտպան Դին Հեյսենը մրցաշրջանի ավարտից հետո կտեղափոխվի Մադրիդի «Ռեալ»։

Արքայական ակումբը 20-ամյա ֆուտբոլիստի համար կվճարի 60 միլիոն եվրո։ Պայմանագիրը կգործի մինչև 2030 թվականի հունիսի 30-ը։

Դին Հեյսենը ծնվել է Ամստերդամում և ունի հոլանդական ծագում, սակայն հինգ տարեկանում ընտանիքի հետ տեղափոխվել է Իսպանիա։ Նա մարզվել է «Մալագայի» ակադեմիայում և 2021 թվականին միացել է «Յուվենտուսին»։ 2024 թվականի ամռանը «Բորնմութը» նրան ձեռք բերեց թուրինյան ակումբից 15 միլիոն եվրոյով և մեկ տարի անց վաճառեց չորս անգամ թանկ։

Երիտասարդական մակարդակում Հեյսենը հանդես է եկել Նիդերլանդների հավաքականում, սակայն հետագայում որոշում է կայացրել խաղալ Իսպանիայի ազգային թիմում։

Դին Հեյսենը կլինի Մադրիդի «Ռեալի» առաջին նորեկը Խաբի Ալոնսոյի գլխավորությամբ, որը պաշտոնը կստանձնի հունիսի 1-ին։