Հայաստանի առաջին մեդալը WKF աշխարհի առաջնությունում. Սուրեն Հարությունյանը բրոնզե մեդալ նվաճեց Կահիրեում
- Հեղինակ: Vahe Hakobyan
- Sportaran
21-ամյա կարատեկա Սուրեն Հարությունյանը (75 կգ) բերել է Հայաստանին իր առաջին մեդալը WKF վարկածով աշխարհի առաջնությունների պատմությունում։ 2025 թվականին Կահիրեում անցկացվող աշխարհի առաջնությունում Հարությունյանը նվաճել է բրոնզե մեդալ՝ 3-րդ տեղի համար կայացած մենամարտում 2:0 հաշվով հաղթելով Ամերիկայի ներկայացուցիչ Սքոթ Թոմասին։
Մրցաշարի ընթացքում հայ մարզիկը ցուցադրել է վստահ և կայուն պայքար՝ հաղթանակներ ձեռք բերելով Ուզբեկստանի, Մեքսիկայի, Թուրքիայի և Մարոկկոյի ներկայացուցիչների նկատմամբ։
2025 թվականի աշխարհի առաջնությունում Հայաստանին ներկայացնում էին երկու մարզիկներ՝ Սուրեն Հարությունյանը (75 կգ) և Գոռ Ներսիսյանը (84 կգ)։ Սակայն մեդալ նվաճել կարողացել է միայն Հարությունյանը՝ գրելով նոր էջ հայկական կարատեի պատմության մեջ։
WKF-ի հովանավորությամբ աշխարհի առաջնությունները անցկացվում են 1970 թվականից, իսկ Հայաստանը մասնակցում է դրանց անկախություն ձեռք բերելուց հետո՝ 1992 թվականից։ Ավելի քան երեք տասնամյակ մրցումներին Հայաստանը մնացել էր առանց մեդալների, և միայն 2025 թվականին հայ մարզիկին հաջողվեց հասնել պոդիումի։
WKF-ը կարատեի աշխարհի ամենամեծ միջազգային կազմակերպությունն է, որն անցկացրել է նաև 2020 թվականի Տոկիոյի Օլիմպիական խաղերի կարատեի մրցումները, որտեղ առաջին անգամ ներկայացվել էր օլիմպիական կարատեն։
Քննարկեք նորությունները!
Անցնել մեկնաբանություններին ↓
Comments
0