Պերկովիչ․ «"Ռիեկայի" գլխավոր սխալը իմ "Նոա" թիմն է»

Երևանի «Նոա»-ի գլխավոր մարզիչ, խորվաթ Սանդո Պերկովիչը մեկնաբանեց իր թիմի հաղթանակը Խորվաթիայի չեմպիոն «Ռիեկայի» նկատմամբ (1:0) Կոնֆերենցիաների լիգայի խմբային փուլի առաջին տուրում, որն անցկացվեց հոկտեմբերի 2-ին՝ Երևանում։

Մարզչի բացման խոսքը․
«Ցանկանում եմ շնորհավորել իմ ֆուտբոլիստներին․ նրանք անցկացրին հրաշալի հանդիպում բարձր մակարդակով։ Խաղից առաջ ասում էի, որ պետք է քաջ լինենք հաղթանակի համար, և հենց այդպես էլ եղավ։ Ֆուտբոլիստները ամեն ինչ տվեցին հաղթանակի համար, դրա համար էլ այն վաստակեցինք։ Շատ ուրախ եմ, որ սկսում ենք խմբային փուլը հաղթանակով և երեք միավորով։ Նշեմ, որ ընդամենը 72 ժամից կարևորագույն հանդիպում ունենք «Ուրարտուի» դեմ, ու հենց այս րոպեից սկսում ենք պատրաստվել այդ խաղին»։

— Ձեր համար ձեռքբերում չէ՞ այն, որ Խորվաթիայի չեմպիոնները Երևանում ընդամենը երկու հարված հասցրին ձեր դարպասին։
— Այն փաստը, որ ես շատ լավ ճանաչում էի «Ռիեկային» և նրանց ֆուտբոլիստներին, օգնեց մեզ։ Բայց հիմնական արժանիքը ֆուտբոլիստներինն է։ Նրանք խաղի ընթացքում ամբողջությամբ պահպանեցին պլանը։ Խաղից առաջ շատ էինք աշխատում ստանդարտների վրա, և հենց այդպիսի մի դրվագից էլ գոլ խփեցինք։

— Որո՞նք էին «Ռիեկայի» գլխավոր սխալները։
— Վաղ թե ուշ ես պիտի վերադառնամ Խորվաթիա (ծիծաղում է)։ Կարծում եմ՝ «Ռիեկայի» գլխավոր սխալը իմ թիմն էր՝ «Նոա»-ն, որովհետև մենք շատ լավ խաղացինք։ «Ռիեկան» հիանալի կազմ ունի․ այնտեղ խաղում են 6–7 հավաքականի ֆուտբոլիստներ։ Այն, որ նրանք չստեղծեցին ոչ մի գոլային պահ, մեծ հպարտություն է ինձ համար։

— Ինչո՞ւ չխաղաց Ուլադ Օմարը։
— Ցավոք, Իմրանը վնասվածք ստացավ «Արարատի» դեմ խաղում, և դա էր պատճառը։

— Մրցակիցը մեծ մասը խաղաց մեկ խաղացող պակաս, բայց «Նոա»-ն չկարողացավ ավելի քան մեկ գոլ խփել։ Ինչո՞ւ։
— Մենք խաղում էինք շատ ուժեղ թիմի դեմ։ Կարող էր թվալ, թե մրցակիցը մեկ խաղացող պակաս լինելով՝ ավելի ազատ գոտիներ կունենար, բայց դիրքային հարձակման և վերջին երրորդում դա այդքան էլ նկատելի չէր։ «Ռիեկան» չէր բացվում՝ հաշվի անկախ։ Կարծում եմ՝ մենք ունեինք 3–4 պահ, եթե գոնե մեկը իրացնեինք, ամեն ինչ ավելի հեշտ կլիներ։ Մի անգամ դիպանք դարպասաձողին, և ևս մեկ 100% պահ ունեցանք, բայց ամենակարևորը՝ հաղթեցինք և վաստակեցինք երեք միավոր։

— Ինչպե՞ս կգնահատեք Տակուտո Օշիմայի խաղը և նրա ադապտացիան։
— Նա շատ լավ հանդիպում անցկացրեց։ Տակուտոն մեծ էներգիա հաղորդեց միջնադաշտին։ Նրան ժամանակ էր պետք նոր երկրում ու նոր թիմում ադապտացվելու համար։ Հիմա նա իսկապես շատ լավ է խաղում, ուրախ եմ, որ նա մեր կազմում է։

— Դուք հաճախ ռոտացիա եք անում, բայց Սերգեյ Մուրադյանը միշտ խաղում է։ Ինչո՞ւ։
— Այո, նա շատ խաղաժամանակ է ստանում, բայց նա երիտասարդ է և կարող է այդպես խաղալ։ Ես միշտ ուզում եմ նրան դաշտում տեսնել։ Նույնիսկ երբ քնում եմ, ստուգում եմ՝ Սերգեյը կողքիս է, թե ոչ։ Կարծում եմ՝ Մուրադյանը հսկայական առաջընթաց է ցուցադրում։ Այսօր նա շատ լավ էր՝ մեկ առ մեկ խաղում և դիրքային տեսանկյունից։ Բացի այդ, նա հիանալի է տիրապետում գնդակին և տեսնում է դաշտը․ սա ֆանտաստիկ է։ Շատ ուրախ եմ, որ ունեմ այդպիսի ֆուտբոլիստ։ Հուսով եմ՝ նա չի դիտելու այս մամուլի ասուլիսը։

— Մտածո՞ւմ եք, որ թիմը ֆիզիկապես պատրաստ է նման ինտենսիվությամբ խաղալ Կոնֆերենցիաների լիգայի բոլոր խաղերը։
— Լիովին վստահ եմ։ Այո, դժվար է լինելու, ծանր օրացույց ունենք, բայց ունենք նաև մեծ կազմ և շատ որակյալ ֆուտբոլիստներ։ Ես օգտագործելու եմ յուրաքանչյուր խաղացողի։

— Այսօր Մուլախուսեյնովիչը խաղաց ամբողջ խաղը և նրան անհրաժեշտ էին լավ փոխանցումներ ձախ եզրից։ Ինչո՞ւ ուշ թողեցիք Տորարինսոնին։
— Ուշ փոխարինումներ կատարեցի, քանի որ գոհ էի թիմի ֆիզիկական վիճակից։ Համաձայն եմ, որ մեզ պետք էին լավ փոխանցումներ, հատկապես առաջին կեսում, բայց երկրորդում արդեն գոհ էի դրանց քանակից և որակից։

— Այս մրցաշրջանում դուք հաղթել եք Չեռնոգորիայի, Սլովենիայի և այժմ Խորվաթիայի չեմպիոններին։ Կարո՞ղ ենք ասել, որ «Նոա»-ն Բալկանների չեմպիոնն է։
— Այո, հետաքրքիր է, բայց նախ պետք էր հաղթել «Ջիբրալթարին», հետո նոր մտածել բալկանյան երկրների չեմպիոն դառնալու մասին։

— Ի՞նչ կասեք մարզադաշտի մթնոլորտի մասին։
— Այո, հիանալի մթնոլորտ էր՝ ի տարբերություն Հայաստանի առաջնության խաղերի։ Տեղական առաջնությունում շատ քիչ երկրպագու է լինում, բայց այսօր ամեն ինչ ֆանտաստիկ էր, մենք մեծ էներգիա ստացանք։ Բայց նախևառաջ ուզում եմ կոչ անել երկրպագուներին այցելել նաև Հայաստանի առաջնության խաղերը։ Այստեղ հրաշալի ու հետաքրքիր խաղեր են անցկացվում, հավատացեք, ցավալի է, որ նման խաղերը տեղի են ունենում դատարկ տրիբունաների առջև։

Վերջաբան․
«Նախորդ մրցաշրջանում վերջին ութ տուրում ես գլխավոր մարզիչն էի «Դինամո Զագրեբում», և մենք չեմպիոնությունը զիջեցինք «Ռիեկային» միայն գոլերի տարբերությամբ։ Այսօր այս հաղթանակը նվիրում եմ հորս․ նա մեծ երկրպագու է «Նոա»-ի և հաստատ կդիտի այս մամուլի ասուլիսը։ Շատ շնորհակալ եմ նրան»։