Օլիմպիա Լյուբլյանա - Ծանոթանալ Նոյի կոնֆերանս լիգայի մրցակցին

Օգոստոսի 21-ին Լյուբլյանայի «Շտոժիցե» մարզադաշտում կսկսվի 2025/26 մրցաշրջանի Կոնֆերենցիաների լիգայի փլեյ-օֆֆի առաջին հանդիպումը։ Հայաստանի չեմպիոն «Նոա»-ն կընդունի Սլովենիայի գլխավոր ակումբը՝ «Օլիմպիան»։ Երկխաղյա դիմակայությունը խոստանում է լարված լինել․ հաղթողը կանցնի մրցաշարի խմբային փուլ։

«Օլիմպիա». ակումբ պատմությամբ ու հավակնություններով

«Օլիմպիան» Սլովենիայի ամենահին ակումբներից է, որը հիմնադրվել է 1945 թվականին երկրի մայրաքաղաքում։ 1990-ականներին թիմը լիովին գերիշխում էր ազգային առաջնությունում՝ նվաճելով չորս տիտղոս անընդմեջ, ինչպես նաև բազմիցս դառնալով Սլովենիայի գավաթի և սուպերգավաթի հաղթող։

2004-ին ակումբը լուծարվեց ֆինանսական խնդիրների պատճառով, սակայն արդեն 2005-ին հիմնվեց նոր թիմ։ Ժամանակակից «Օլիմպիան» պաշտոնապես համարվում է նոր ակումբ, որն իր պատմությունը սկսել է 2005 թվականից, բայց շատ արագ վերածվեց սլովենական ֆուտբոլի առաջատար ուժի։ 2010-ականների կեսերից «Օլիմպիան» չորս անգամ դարձել է երկրի չեմպիոն, այդ թվում վերջին՝ 2024/25 մրցաշրջանում։

Մարզադաշտը, երկրպագուները, մթնոլորտը

Ակումբի տնային մարզադաշտը «Շտոժիցեն» է, որը բացվել է 2010-ին։ Այն ժամանակակից ասպարեզ է՝ ավելի քան 16 հազար հանդիսականների համար նախատեսված տեղերով, և Սլովենիայի ամենամեծ մարզադաշտն է։ Ակումբի առանձնահատուկ հպարտությունը երկրպագուների «Կանաչ վիշապներ» միավորումն է, որն աչքի է ընկնում վառ աջակցությամբ և գունեղ պերֆորմանսներով։ Ակումբի խորհրդանիշը՝ վիշապը, դարձել է Լյուբլյանայի իսկական խորհրդանիշ։

Կազմը և փոփոխությունները

Չեմպիոնական մրցաշրջանից հետո «Օլիմպիայի» կազմը զգալիորեն փոխվեց։ Թիմը լքեցին գրեթե բոլոր հիմնական պաշտպանները, այդ թվում՝ Դավիդ Սուալեխեն, որը միացավ «Նոա»-ին։ Վաճառվեց նաև թիմի առաջատար Ռաուլ Ֆլորուչը՝ 5 մլն եվրոյով Բելգիայի «Յունիոն Սեն-Ժիլուազին»։

Միևնույն ժամանակ ակումբը ակտիվորեն ուժեղացավ։ Նորեկների թվում են Հյուսիսային Մակեդոնիայի հավաքականի հարձակվող Դիմիտար Միտրովսկին և պաշտպան Յոստա Ուրբանչիչը։

Թիմի համար մրցաշրջանի մեկնարկը հեշտ չէր․ «Ցելյեի» հետ 0-5 հաշվով պարտությունից հետո պաշտոնանկ արվեց գլխավոր մարզիչ Ժորժե Սիմաոն։ Նրան փոխարինեց հոլանդացի Էրվին վան դե Լույը։ Նրա ղեկավարությամբ «Օլիմպիան» 1-3 հաշվով պարտվեց «Կոպերին», սակայն Կոնֆերենցիաների լիգայում լրացուցիչ ժամանակում հաղթեց ալբանական «Էգնատիային»։

Չնայած առաջատարների հեռանալուն, կազմը շարունակում է մնալ ուժեղ։ Հիմնական խաղացողներից են․

Ալեքս Բլանկո — փորձառու իսպանացի վինգեր, ով խաղացել է Լա Լիգայում և Սերիա B-ում։

Ալեքս Թամմ — Էստոնիայի հավաքականի հարձակվող, որը 2024-ին խփել է 28 գոլ, իսկ Սլովենիայում՝ 12 խաղում 6 գոլ։

Դիմիտար Միտրովսկի — Հյուսիսային Մակեդոնիայի հավաքականի հիմնական խաղացող, երիտասարդական հավաքականում անցկացրել է 17 խաղ և խփել 7 գոլ։ Թիմի ամենաթանկ խաղացողը՝ 1.5 մլն եվրո արժեքով։

Անտոնիո Մարին — Զագրեբի «Դինամոյի» սան, Խորվաթիայի քառակի չեմպիոն, երիտասարդական հավաքականի նախկին հիմնական խաղացող։

Սակայն կան նաև տխուր նորություններ․ կենտրոնական կիսապաշտպան Ագուստին Դոֆֆոն նախորդ խաղում ստացել է գլխի վնասվածք և հնարավոր է բաց թողնի առաջին հանդիպումը։

Հայաստան — Սլովենիա եվրոպական մրցաշարերում․ հանդիպումների պատմություն

Հայաստանի և Սլովենիայի ակումբները եվրոգավաթներում մրցել են հինգ անգամ։ Միայն մեկ անգամ է հայկական թիմը հաղթանակ տարել․

2002/03, ԵԼ․ «Զվարթնոց-Երևան» — «Պրիմորյե» 3-6

2017/18, ԵԼ․ «Շիրակ» — «Գորիցա» 2-4

2020/21, ԵԼ․ «Արարատ-Արմենիա» — «Ցելյե» 1-0 (մեկ խաղ՝ համավարակի պատճառով)

2021/22, ԿԼ․ «Ուրարտու» — «Մարիբոր» 0-2

2023/24, ԿԼ․ «Փյունիկ» — «Ցելյե» 2-4

Պատմությունը խոսում է սլովենական ակումբների առավելության մասին, սակայն հայկական թիմերը միշտ պատրաստ են պայքարել և անակնկալ մատուցել։

Կանխատեսումներ և ակնկալիքներ

«Նոա»-ն բախվելու է լուրջ մրցակցի։ «Օլիմպիան» պահպանում է բարձր խաղային մակարդակը, իսկ նոր տրանսֆերներն ու փորձառու մարզիչը կարող են դառնալ վճռորոշ գործոններ։ Լյուբլյանայում սպասվող առաջին խաղը խոստանում է լինել տպավորիչ՝ վիշապով տրիբունաներում, երկրպագուների վառ աջակցությամբ և իսկական պայքարով Կոնֆերենցիաների լիգայի խմբային փուլում տեղ գրավելու համար։

Հանդիպումը «Օլիմպիա Լյուբլյանա» (Սլովենիա) — «Նոա» (Հայաստան) կկայանա օգոստոսի 21-ին, Լյուբլյանայում։ Սկիզբը՝ Երևանի ժամանակով 22։00։