Օլիմպիական չեմպիոն Ռազամբեկ Ջամալովը բաց կթողնի 2025 թվականի ըմբշամարտի Աշխարհի առաջնությունը

Փարիզի Օլիմպիական խաղերի հաղթող Ռազամբեկ Ջամալովը (Ուզբեկստան) չի մասնակցի 2025 թվականի ըմբշամարտի Աշխարհի առաջնությանը։ Ինչպես հայտնել է ինքը՝ մարզիկը United World Wrestling-ին տված հարցազրույցում, մայիսի 19-ին Մոսկվայում նա ենթարկվելու է ծնկի վիրահատության, ինչի պատճառով էլ բաց կթողնի մրցաշրջանի մնացած մասը։

Սա կլինի 26-ամյա ըմբիշի տասներորդ վիրահատությունը կարիերայում և երկրորդը՝ վերջին ութ ամիսների ընթացքում։ Հիշեցնենք, որ 2024 թվականի օգոստոսին Օլիմպիական խաղերում հաղթելուց հետո Ջամալովը վիրահատություն էր տարել ուսի շրջանում։

«Սա արդեն հինգերորդ վիրահատությունն է ծնկիս վրա», — ասել է Ջամալովը։ — «Ես ունեցել եմ նաև երեք վիրահատություն ուսերիս վրա, մեկ՝ պարանոցիս, և մեկ՝ նշագեղձերի հեռացման։ Շատ դժվար է հաշտվել այն փաստի հետ, որ չեմ կարողանա հանդես գալ Աշխարհի առաջնությունում։ Հուսով էի, թե կկարողանամ վերականգնվել, բայց հին վնասվածքը կրկին զգացնել տվեց՝ խաչաձեւ կապանքի ամբողջական պատռվածք, որն ստացել էի դեռ Հունգարիայում անցկացվող մրցաշարից առաջ»։

Չնայած բարդ վնասվածքներին և վերականգնման ընթացքին՝ Ջամալովը մտադիր չէ ավարտել կարիերան։

«Թեկուզ՝ տասը վիրահատությունից հետո, ես դեռ ուզում եմ շարունակել պայքարել։ Պլանավորում եմ վերադառնալ գորգ 2026 թվականի սկզբին։ Առանց ըմբշամարտի կյանքը ձանձրալի է։ Իհարկե, երբեմն կասկածներ են լինում, բայց փորձում եմ աշխատել և հավատալ լավին», — կիսվել է նա։