Օյգեն Պոլանսկին ժամանակավորապես կգլխավորի «Բորուսիա Մ»-ը, լավ ճանաչելով Ռանոսի ուժեղ կողմերը

«Բորուսիա Մյունխենգլադբախի» գլխավոր մարզիչ Գերարդո Սեոանեի հեռացումից հետո ակումբը թիմի ղեկը վստահեց Օյգեն Պոլանսկիին։ 39-ամյա մասնագետը, որը մինչ այդ աշխատում էր «կռունկների» կրկնակի կազմում, ժամանակավորապես կղեկավարի գլխավոր թիմը։

Պոլանսկին լավ է ծանոթ Հայաստանի հավաքականի հարձակվող Գրանտ-Լեոն Ռանոսի հնարավորություններին։ Նրա ղեկավարությամբ հարձակվողը անցկացրել է 12 հանդիպում U23 թիմում՝ դառնալով 6 գոլի և 6 գոլային փոխանցման հեղինակ։ Այժմ հետաքրքիր է՝ որքանով նոր ժամանակավոր գլխավոր մարզիչը պատրաստ է խաղային ժամանակ վստահել Ռանոսին Բունդեսլիգայում։

Արդեն 2023 թվականին Պոլանսկին բարձր էր գնահատել հայ հարձակվողի որակները․

«Բունդեսլիգայի կազմում չգտնվող խաղացողի մտքում միշտ ինչ-որ բան է կատարվում։ Կարևոր է, որ հիասթափությունը վերածվի դրական էներգիայի․ վերջին մի քանի խաղերում նա ցույց տվեց դա։ Միայն այդպես նա կկարողանա բարելավել իր խաղը և առաջ շարժվել կարիերայում։
Գրանտը խաղացող է, որը լավ տեղավորվում է գծերի միջև։ Նա լավ է տեսնում ազատ տարածքը, ունի հեռահար հարված և, իհարկե, կարևոր դեր խաղաց շաբաթ օրը։ Համոզված եմ՝ դա կարևոր է հարձակվողի համար։ Ամեն գոլ օգնում է»։

Մոտակա հանդիպումները ցույց կտան՝ արդյոք Պոլանսկին կկարողանա փոխել իրավիճակը ակումբում և ինչ տեղ կզբաղեցնի Ռանոսը նրա պլաններում։