Պաշտոնական․ Յուսուֆ Օտուբանջոն հեռացավ «Փյունիկից» և տեղափոխվեց «Նասաֆ»

«Փյունիկի» հարձակվող Յուսուֆ Օտուբանջոն իր կարիերան կշարունակի Ուզբեկստանի «Նասաֆ» ակումբում։ Նիգերիացի 32-ամյա ֆորվարդը Ուզբեկստանի չեմպիոնների հետ ստորագրել է 1.5 տարվա պայմանագիր։

Օտուբանջոն Հայաստանում անցկացրեց վեց տարի՝ հանդես գալով «Արարատ-Արմենիա» և «Փյունիկ» ակումբներում։ Այդ ընթացքում նա մասնակցեց Հայաստանի Պրեմիեր լիգայի 144 խաղի և խփեց 79 գոլ՝ դառնալով մրցաշարի պատմության ամենաարդյունավետ լեգեոներներից մեկը։

Հայաստանին հրաժեշտ տալով՝ Յուսուֆը դիմեց երկրպագուներին․

«Բարև բոլորին։ Գիտեմ՝ դուք շատ հարցեր ունեք, որոնց պետք է պատասխանել, բայց այս պահին ուզում եմ մեծ շնորհակալություն հայտնել այս հիասքանչ երկրին՝ Հայաստանին, հատկապես այն փորձի և հիշողությունների համար, որոնք այստեղ ստացա։ Ես իսկապես շնորհակալ եմ ամեն ինչի համար։ Շնորհակալություն Արարատ-Արմենիային՝ համեստ սկիզբի և այն տեղի համար, որը դարձավ իմ տունը։ Փյունիկ, ես չեմ կարող ամեն ինչ բառերով արտահայտել… Մեկ իմաստուն մարդ ինձ ասաց, որ երբ գա ճիշտ ժամանակը, դու դա կզգաս և կանես լավագույնը»։

Հայաստանում Օտուբանջոն նաև հիշվեց նրանով, որ Կոնֆերենս լիգայի խաղերից մեկում գոլի հեղինակ դառնալուց հետո ցուցադրեց «Stand with Armenia» գրությամբ մարզաշապիկը՝ Արցախյան պատերազմի ընթացքում։

«Նասաֆում» ընդգծեցին, որ հույս ունեն Օտուբանջոյի փորձի վրա և վստահ են, որ նա կօգնի թիմին հասնել նոր հաղթանակների և նվաճել տիտղոսներ։