Պաշտոնական․ Ռուի Մոտան լքել է «Լուդոգորեցը»

Երևանի «Նոա»-ի նախկին գլխավոր մարզիչ Ռուի Մոտան լքել է բուլղարական «Լուդոգորեցը»։ Ռազգրադի ակումբը հաստատել է, որ պորտուգալացի մասնագետի և նրա շտաբի հետ բանակցություններ է վարում պայմանագրի վաղաժամ լուծման վերաբերյալ։

Ինչպես հաղորդում է «Լուդոգորեց»-ի մամուլի ծառայությունը, վաղը ժամը 13:30-ին Նեսեբարում կայանալիք Բուլղարիայի գավաթի խաղում «Չեռնոմորեց»-ի (Բուրգաս) դեմ թիմը կղեկավարի ակումբի երկրորդ թիմի գլխավոր մարզիչ Տոդոր Ժիվոնդովը։

Ակումբի ղեկավարությունը նշել է, որ բաժանման պատճառը վերջին ամիսների անբավարար արդյունքներն ու խաղի մակարդակն են, որոնք չեն համապատասխանում ակումբի վերջին տարիների բարձր չափանիշներին։

Հիշեցնենք, որ Ռուի Մոտան «Լուդոգորեց»-ը գլխավորեց 2025 թվականի ամռանը՝ «Նոա»-ից հեռանալուց հետո, որի հետ նա հաղթել էր Հայաստանի առաջնությունում։ Պորտուգալացի մարզչի ղեկավարությամբ բուլղարական թիմը կարողացավ դուրս գալ Եվրոպայի Լիգայի հիմնական փուլ, որտեղ երեք տուրերից հետո ունի 3 միավոր՝ հաղթանակ «Մալմյոյի» նկատմամբ և պարտություններ «Ռեալ Բետիս»-ից ու «Յանգ Բոյզ»-ից։

Բուլղարիայի առաջնությունում «Լուդոգորեց»-ը զբաղեցնում է չորրորդ տեղը՝ ունենալով 6 հաղթանակ և 5 ոչ ոքի 12 խաղից հետո, արդյունք, որը ակումբի ղեկավարությունը համարել է անհամարժեք։