Պաշտոնապես. Գրանթ-Լեոն Ռանոսը միանում է Կայզերսլաուտերնին

Պաշտոնապես հաստատված է։ Հայաստանի հավաքականի հարձակվող Գրանտ-Լեոն Ռանոսը վարձակալությամբ տեղափոխվել է «Բորուսիա Մյոնխենգլադբախ»-ից դեպի Երկրորդ Բունդեսլիգայի «Կայզերսլաուտերն» թիմը։

21-ամյա հայ ֆուտբոլիստը նոր թիմում հանդես կգա վարձակալության հիմունքներով՝ առանց գնելու իրավունք մինչև 2025 թվականի ամառ։

«Գրանտն ունի մեծ տաղանդ և կարող է օգտագործվել հարձակման տարբեր դիրքերում։ Դա մեզ հավելյալ ճկունություն է տալիս։ Իր գոլային բնազդի և արդյունավետության շնորհիվ նա ոչ միայն կուժեղացնի մեր թիմում առկա մրցակցությունը, այլև կխորացնի կազմի ներուժը։ Մենք վստահ ենք, որ նա կարող է բարելավել մեր խաղը, նպաստել թիմային նպատակների իրականացմանը և կատարել կարեւոր քայլեր իր անձնական զարգացման մեջ», — նշել է «Կայզերսլաուտերնի» գործադիր տնօրեն Թոմաս Հենգենը։

Ռանոսն իր տեղափոխությունը մեկնաբանել է հետևյալ կերպ.
«Անհամբեր սպասում եմ իմ նոր մարտահրավերին այստեղ՝ «Կայզերսլաուտերն»-ում, որտեղ հուսով եմ, որ կկարողանամ արագացնել իմ մարզական զարգացումը՝ կանոնավոր խաղաժամանակի շնորհիվ։ Առավել եւս մոտիվացված եմ օգնելու ակումբին հասնել իր նպատակներին։ «Կայզերսլաուտերն»-ը Գերմանիայի լեգենդար ակումբ է, և այս թիմի մարզաշապիկը կրելը ինձ համար մեծ պատիվ է։ Ակումբի հետ քննարկումները ինձ արագ համոզեցին, որ կարիերայիս այս փուլում սա ճիշտ որոշում է։ Շնորհակալություն Ռոլանդ Վիրկուսին և «Բորուսիային» ինձ այս ճանապարհին աջակցելու համար»։

Ներկայումս «Կայզերսլաուտերն»-ը զբաղեցնում է 5-րդ տեղը Երկրորդ Բունդեսլիգայում և պայքարում է բարձրագույն դիվիզիոն դուրս գալու համար։