Պաշտոնապես. ՀՖՖ-ըն ներկայացրել է իր դիրքորոշումը ՈւԵՖԱ-ին Ուկրաինայի հետ խաղից հետո տեղի ունեցած միջադեպի վերաբերյալ

Հայաստանի ֆուտբոլի ֆեդերացիան (ՀՖՖ) պաշտոնապես նամակ է հղել ՈՒԵՖԱ՝ ի պատասխան Ուկրաինայի ֆուտբոլային ասոցիացիայի (ՈւՖԱ) դիմումի՝ կապված 2026 թ. ֆուտզալի Եվրոպայի առաջնության խմբային փուլի Հայաստան — Ուկրաինա հանդիպումից հետո տեղի ունեցած միջադեպի հետ:

ՀՖՖ-ից հայտնել են, որ ՈւԵՖԱ ուղարկված նամակում ներկայացրել են Հայաստան — Ուկրաինա հանդիպումից առաջ և հանդիպման ժամանակ տեղի ունեցած դեպքերը, ինչպես նաև իրենց գնահատականը՝ Ուկրաինայի կողմի բողոքի առարկա դարձած դրվագների վերաբերյալ։ ՀՖՖ-ի կարծիքով՝ ՈւՖԱ-ի պնդումները հիմնավորված չեն։ Հայկական կողմը խոստացել է իր դիրքորոշման մանրամասները ներկայացնել ավելի ուշ:

Հատուկ ընդգծվել է, որ Հայաստանի ֆուտզալի ազգային հավաքականի խաղացող Դենիս Նևեդրովի խոսքերում որևէ վիրավորական բան չի եղել, և նրա հասցեին հնչած մեղադրանքները չեն համապատասխանում իրականությանը։

Ավելի վաղ Ուկրաինայի ֆուտբոլային ասոցիացիան պաշտոնապես դիմել էր ՈւԵՖԱ-ի Վերահսկողության, էթիկայի և կարգապահական մարմին (CEDB)։ Դիմումի պատճառ էր դարձել Նևեդրովի էմոցիոնալ արձագանքը խաղի ավարտից հետո։ Ուկրաինական կողմի պնդմամբ՝ «Տյումեն» ակումբում հանդես եկող հարձակվողը հայհոյանքներ է հնչեցրել Ուկրաինայի խաղացողների հասցեին։ Բացի այդ, ՈւՖԱ-ն ուշադրություն էր դարձրել նաև խաղացողի Ինստագրամում արված հրապարակումներին, որոնք, ըստ նրանց, պարունակել են Ուկրաինայի թիմի հասցեին վիրավորական էմոջիներ։

Հանդիպումն ավարտվել էր Հայաստանի հավաքականի հաղթանակով՝ 2:1 հաշվով։ Երկու գոլի հեղինակը եղել է Միգրան Դերմենջյանը։ Այս հաղթանակը պատմական էր՝ Հայաստանի առաջինը ֆուտզալի Եվրոպայի առաջնությունների եզրափակիչ փուլերում։

Այժմ կողմերը սպասում են ՈւԵՖԱ-ի որոշմանը, որն, ըստ ամենայնի, կընդունվի մինչև մրցաշարի հաջորդ հանդիպումը։