Պաշտոնապես. Եվգենի Ծիմբալյուկը կրկին «Ուրարտու»-ում է

Ուկրաինացի պաշտպան Եվգենի Ծիմբալյուկը վերադառնում է Երևանի «Ուրարտու»: Ակումբը պաշտոնապես հայտարարեց 29-ամյա կենտրոնական պաշտպանին պայմանագրով նորից թիմին միացնելու մասին։ Ծիմբալյուկը «Ուրարտու»-ի կազմում հանդես էր եկել 2022/23 և 2023/24 մրցաշրջաններում՝ դառնալով Հայաստանի չեմպիոն և Գավաթակիր։

Անցած մրցաշրջանում Ծիմբալյուկը խաղացել է Ռումինիայի երկրորդ դիվիզիոնում, իսկ այժմ վերադարձել է հայկական ակումբ։

Սա «Ուրարտու»-ի արդեն երրորդ տրանսֆերն է այս ամռանը, և բոլոր երեքն էլ վերադարձներ են։ Ավելի վաղ վարձակալությունից թիմ էին վերադարձել կիսապաշտպաններ Արման Քազարյանն ու Էդիկ Վարդանյանը։

Հիշեցնենք, որ փակ շրջանի ընթացքում «Ուրարտու»-ում փոփոխություններ եղան նաև մարզչական շտաբում․ Դմիտրի Գունկոյին, ով շարունակեց կարիերան Ռուսաստանում, փոխարինեց Ռոբերտ Արզումանյանը, որը նախկինում ևս աշխատել է ակումբում։

Այժմ «Ուրարտու»-ն ակտիվորեն պատրաստվում է ՈՒԵՖԱ-ի 2025/26 թթ․ Կոնֆերենցիայի լիգայի որակավորման մրցաշարին։ Առաջին փուլում հայաստանյան թիմը կմրցի բելառուսական «Նեմանի» հետ։ Խաղերը կկայանան հուլիսի 10-ին և 17-ին։