Պաշտոնական․ Դավիդ Սուալեհեն դարձավ «Նոայի» ֆուտբոլիստ

28-ամյա պորտուգալացի ձախ պաշտպան Դավիդ Սուալեհեն պաշտոնապես տեղափոխվեց հայկական «Նոա» ակումբ։ Խաղացողը, ազատ գործակալի կարգավիճակով, պայմանագիր է կնքել Հայաստանի գործող չեմպիոնի հետ։

Վերջին երեք մրցաշրջաններում Սուալեհեն հանդես էր գալիս «Օլիմպիա Լյուբլյանայի» կազմում, որի հետ երկու անգամ նվաճել է Սլովենիայի չեմպիոնի տիտղոսը և երկու անգամ մասնակցել Կոնֆերենցիաների լիգայի հիմնական փուլին։ Ավելի վաղ նա խաղացել է նաև պորտուգալական «Պասուշ դե Ֆերեյրա» և «Ֆարենսե» ակումբներում։ «Պորտուի» հայտնի ակադեմիայի սան Սուալեհեն Պորտուգալիայի երիտասարդական հավաքականի կազմում անցկացրել է 4 հանդիպում։

Ֆուտբոլիստի տրանսֆերային արժեքը գնահատվում է 300 հազար եվրո։

«Նոայի» կազմում Դավիդ Սուալեհեն ընտրել է 33 համարի մարզաշապիկը։

Հիշեցնենք, որ «Նոան» ակտիվորեն նախապատրաստվում է Կոնֆերենցիաների լիգայի որակավորման փուլին։ Ակումբն իր առաջին հանդիպումը կանցկացնի հուլիսի 8-ին Երևանում՝ Մոնտենեգրոյի «Բուդուչնոստի» դեմ։