ՊԱՇՏՈՆԱԿԱՆ․ Ալիուն Նդուրը՝ «Արարատ-Արմենիայի» խաղացող

«Արարատ-Արմենիա» ֆուտբոլային ակումբը հայտարարել է սենեգալցի հարձակվող Ալիուն Նդուրի (Alioune Ndour) հետ պայմանագիր կնքելու մասին։ 28-ամյա ֆուտբոլիստը Երևանի ակումբ է տեղափոխվել բելգիական «Զյուլտե Վարեգեմից» և պայմանագիր է ստորագրել մինչև 2028 թվականը։

Նախորդ մրցաշրջանում Նդուրը վարձակալությամբ հանդես է եկել նորվեգական «Կրիստիանսունդում», որը խաղում է Նորվեգիայի Բարձրագույն լիգայում։ Թիմի կազմում սենեգալցին մասնակցել է 37 հանդիպման՝ խփելով 7 գոլ։

Ավելի վաղ հարձակվողը հանդես է եկել Բելգիայի առաջնությունում, որտեղ 24 խաղում խփել է 6 գոլ և կատարել 4 գոլային փոխանցում։ Նդուրի կարիերայի ամենահաջող մրցաշրջանը եղել է 2022 թվականը Նորվեգիայում․ այն ժամանակ նա 18 խաղում հավաքել է 14 միավոր «գոլ+փոխանցում» համակարգով (9 գոլ և 5 ասիստ)։

Transfermarkt-ի տվյալներով՝ ֆուտբոլիստի տրանսֆերային արժեքը գնահատվում է 400 հազար եվրո։

Ալիուն Նդուրը դարձել է «Արարատ-Արմենիայի» երկրորդ նորեկը ձմեռային տրանսֆերային պատուհանի ընթացքում․ ավելի վաղ ակումբը պայմանագիր էր կնքել մարոկկացի պաշտպան Բուշաիբ Արրասսիի հետ։

Այս պահին Հայաստանի առաջնության առաջատարը ուսումնամարզական հավաք է անցկացնում Կիպրոսում։