Երևանի «Նոա»-ում հերթական կադրային փոփոխությունները. թիմը լքել են ևս չորս ֆուտբոլիստ

Չեմպիոնական սեզոնի ավարտից հետո Երևանի «Նոա»-ն շարունակում է բաժանվել խաղացողների հետ։ Թիմը լքել են ևս չորս ֆուտբոլիստ, ովքեր չունեին կայուն տեղ հիմնական կազմում։

Թիմը լքածների թվում է հարձակվող Գրենիկ Պետրոսյանը, որը անցկացրել է լիարժեք մրցաշրջան։ 29 խաղում նա դարձել է երկու գոլի և մեկ գոլային փոխանցման հեղինակ՝ խաղալով որպես եզրային հարձակվող կամ հարձակվողի հետևում։

Թիմը լքել են նաև երեք պաշտպան․

• Համես Սանտոսը՝ ձախ պաշտպան, թիմում անցկացրել է կես տարի և մասնակցել 8 խաղի։

• Մարկոս Պեդրոն՝ ևս ձախ պաշտպան, մեկ մրցաշրջանում մասնակցել է 12 խաղի (1 գոլ) առաջին թիմի կազմում և 7 խաղի՝ «Նոա-2»-ում։

• Բրայան Մենդոսան՝ աջ պաշտպան, մասնակցել է 22 խաղի, խփել մեկ գոլ և կատարել մեկ գոլային փոխանցում։

Ավելի վաղ «Նոա»-ից հեռացել էր ևս մեկ պաշտպան՝ Ալեքսանդր Միլկովիչը։

Կարևոր է նշել, որ նշված խաղացողների որևէ մեկը նախորդ մրցաշրջանում հիմնական կազմի խաղացող չէր։

«Նոա»-ն՝ որպես Հայաստանի չեմպիոն, կմասնակցի Չեմպիոնների լիգայի 2025/26 մրցաշրջանի որակավորման առաջին փուլին։ Վիճակահանությունը կկայանա հունիսի 17-ին։

Կարդացեք նաև․ ՖԻՖԱ-ն տրանսֆերային արգելք էր դրել «Նոա»-ի վրա, սակայն իրավիճակն արդեն կարգավորված է։