Նոր գլխավոր մարզիչը ներկա գտնվեց Հայաստանի առաջնության իր առաջին հանդիպմանը

Հոլանդացի մասնագետ Ջոն Վան’տ Սխիպը մարտի 1-ից պաշտոնապես ստանձնեց Հայաստանի ազգային հավաքականի գլխավոր մարզչի պարտականությունները։ Շաբաթ օրը 61-ամյա հոլանդացին ներկա գտնվեց Հայկական Պրեմիեր լիգայի «Փյունիկ» – «Արարատ-Արմենիա» հանդիպմանը։

Նրա աշխատանքային սկիզբը Հայաստանում համընկավ բողոքի ակցիայի հետ․ ավելի քան մեկ ժամ Վան’տ Սխիպը ստիպված էր հետևել ոչ միայն խաղին, այլև բողոքող երկրպագուներին։ Սակայն հանդիպումն, այնուամենայնիվ, կայացավ։

Այս խաղում դաշտ դուրս եկան Հայաստանի հավաքականի երկու պոտենցիալ դարպասապահներ՝ Ստանիսլավ Բուչնևը և Հենրի Ավագյանը։ Պաշտպանական գծում ևս հանդես եկան ազգային թիմի մի քանի թեկնածուներ․ «Փյունիկի» փորձառու կենտրոնական պաշտպաններ Վարազդատ Հարոյանը և Տարոն Ոսկանյանը, ինչպես նաև «Արարատ-Արմենիայի» եզրային խաղացողներ Կամո Հովհաննիսյանը և Էդգար Գրիգորյանը։

Կիսապաշտպաններից «Փյունիկի» կազմում 78 րոպե խաղաց Սոլոմոն Ուդոն, իսկ «Արարատ-Արմենիայի» կազմում ամբողջ հանդիպումն անցկացրեց Արմեն Համբարձումյանը։ Միևնույն ժամանակ Դավիթ Դավիդյանը, Հովհաննես Հարությունյանը և Ժիրայր Շաղոյանը քիչ խաղային ժամանակ ստացան, այդպիսով չկարողացան լիարժեք դրսևորել իրենց նոր գլխավոր մարզչի աչքի առաջ։

Photo: Urish Football.