Հայաստանի նոր հույսը սառույցի վրա․ Ակոպովան և Ռախմանինը կմասնակցեն օլիմպիական վարկանիշային մրցաշարին

Հայաստանի գեղասահքի ֆեդերացիան հայտնել է, որ երկրի ներկայացուցիչները կմասնակցեն սեպտեմբերին Պեկինում կայանալիք օլիմպիական վարկանիշային մրցաշարին։ Հայտագրված մասնակիցների թվում են մենասահորդ Սեմյոն Դանիելյանցը, պարային զույգ Վիկտորիա Ազրոյան – Արթուր Գրուզդևը և սպորտային զույգ Կարինա Ակոպովա – Նիկիտա Ռախմանին։

Հատուկ ուշադրության է արժանանում վերջին զույգը, որն այսօր վերջերս է միացել հայկական հավաքականին։ 21-ամյա Ակոպովան և 26-ամյա Ռախմանինը ռուսական գեղասահքի դպրոցի սաներ են, համատեղ ելույթ են ունենում 2020 թվականից և մարզվում են Սոչիում՝ օլիմպիական մեդալակիր Ֆյոդոր Կլիմովի ղեկավարությամբ։ Նրանք արժանացել են մրցանակային տեղերի միջազգային մրցաշարերում՝ հաղթանակներ գրանցելով Budapest Trophy-ում և Denis Ten Memorial Challenge-ում, ինչպես նաև նվաճել են արծաթ Challenge Cup-ում։

2025 թվականի մայիսի 14-ին Ռուսաստանի գեղասահքի ֆեդերացիայի գործկոմը պաշտոնապես հաստատել է Ակոպովայի և Ռախմանինի տեղափոխությունը՝ Հայաստանի դրոշի տակ հանդես գալու համար։ Կարինայի խոսքով՝ պատմական հայրենիքը ներկայացնելու ցանկությունն իր մեջ եղել է մանկուց․

«Ես հայ եմ, իմ բոլոր հարազատները հայ են։ Դեռ մանկուց, երբ մարզվում էի Ստաս Մորոզովի մոտ, նա ասում էր՝ “Պետք է Հայաստանի համար հանդես գաս”։ Այդ խոսքերը միշտ ինձ հետ են մնացել», — ասել է գեղասահորդուհին։
«Ինձ կատակի տեսքով “տատիկ Սիրանուշ” էին անվանում», — ավելացրել է նա ժպիտով։

Մենասահորդ Սեմյոն Դանիելյանցն արդեն հնարավորություն է ունեցել նվաճելու օլիմպիական ուղեգիր 2025 թվականի աշխարհի առաջնությունում, սակայն առայժմ դա նրան չի հաջողվել։