Նորբերտո Բրիասկո-Բալեկյանը անցկացրեց իր լավագույն խաղերից մեկը «Հիմնասիա ի Էսգրիմայի» կազմում

Արգենտինական Կլաուսուրայի 3-րդ տուրի խաղում «Հիմնասիա ի Էսգրիման» նվազագույն հաշվով՝ 1:0, հաղթեց «Ինդեպենդյենտեին»: Հանդիպման հերոսներից մեկն էր Հայաստանի հավաքականի հարձակվող Նորբերտո Բրիասկո-Բալեկյանը, ով երկրորդ անգամ անընդմեջ հայտնվեց մեկնարկային կազմում՝ վերջին շրջանում իր համար հազվադեպ երևույթ:

Բրիասկոն դաշտում անցկացրեց 67 րոպե և ցուցադրեց բարձր ակտիվություն։ Նրա հաշվին են՝ մեկ հարված դարպասաձողին, երկու հիմնական փոխանցում, երկու ստեղծված գոլային պահ, հինգ հաղթած մենամարտ, չորս վաստակած տուգանային հարված և մեկ հաջող խլում։ Արգենտինացի լրագրողների կարծիքով սա Բրիասկոյի լավագույն խաղն էր «Հիմնասիայի» կազմում։

«Նրա ճիշտ դիրքն ընտրեցին։ Սա տպավորիչ ելույթ էր՝ արագություն, ցանկություն, ագրեսիա։ Բետոն կարող է թիմի համար լուրջ ուժեղացում լինել», – ասել է լրագրող Լաուտարո Պերեսը։

«Սա նրա լավագույն խաղն էր «Լոբոյի» մարզադաշտում։ Նա ակտիվ մասնակցում էր հարձակողական գործողություններին և իրական շանսեր ուներ աչքի ընկնելու համար», – հավելել է լրագրող Ագուստին Սաբալետան։

Չնայած վերջին տարիներին ստացած բազմաթիվ վնասվածքներին՝ Բրիասկոն շարունակում է մնալ բարձր ներուժ ունեցող ֆուտբոլիստ։ Բարձր մակարդակի մեկ ամբողջական մրցաշրջանը կարող է հարձակվողին վերադարձնել այն ֆորման, երբ նա համարվում էր արգենտինական ֆուտբոլի ամենահեռանկարային խաղացողներից մեկը, ումով հիանում էր Դիեգո Արմանդո Մարադոնան, իսկ «Բոկա Խունիորսը» նրա համար վճարեց 4.2 մլն եվրո՝ երկարաժամկետ պայմանագիր կնքելով, որը գործում է մինչև 2026-ի ամառը։ Հիշեցնենք, որ Բալեկյանը վարձավճարով է հանդես գալիս և դեկտեմբերին պետք է վերադառնա «Բոկա»:

Բրիասկոն Հայաստանի հավաքականի կազմում անցկացրել է 18 խաղ։