«Նոան» պատմության մեջ առաջին անգամ դուրս եկավ Չեմպիոնների լիգայի որակավորման երկրորդ փուլ (ՏԵՍԱՆՅՈՒԹ)

Հայաստանի չեմպիոն «Նոան» պատմական հաջողության հասավ՝ երկխաղյա դիմակայությունում հաղթելով Չեռնոգորիայի «Բուդուչնոստին» և առաջին անգամ պատմության մեջ դուրս գալով Չեմպիոնների լիգայի որակավորման երկրորդ փուլ։

Երևանում առաջին խաղում 1:0 հաշվով հաղթանակից հետո՝ հայաստանյան թիմը Պոդգորիցայում գրանցեց 2:2 ոչ ոքի՝ ընդհանուր 3:2 հաշվով ապահովելով հաջորդ փուլ դուրս գալը։

Հյուրերը վստահ սկսեցին հանդիպումը․ արդեն առաջին խաղակեսում գոլերով աչքի ընկան Իմրան Ուլադ Օմարը և թիմի նորեկ Ալեն Գրգիչը։ 17-րդ րոպեին «Բուդուչնոստը» մնաց տասը հոգով՝ Իվան Բուլատովիչը հեռացվեց դաշտից։ Թվում էր՝ երկրորդ խաղակեսում «Նոան» թվային առավելությամբ հանգիստ կհասնի հաղթանակի, սակայն մրցակիցը վճռական էր։

68-րդ րոպեին Իգոր Իվանովիչը տպավորիչ գոլ խփեց տուգանային հրապարակից դուրս, իսկ ավելացված ժամանակում Պետար Գրբիչը հավասարեցրեց հաշիվը՝ 2:2։ Այդուհանդերձ, մի րոպե առաջ «Նոայի» փոփոխության դուրս եկած Մաթեուս Այյասը վրիպեց 11-մետրանոցից, որը հենց ինքն էր վաստակել։

ՏԵՍԱՆՅՈՒԹ՝ «Բուդուչնոստ» - «Նոա» խաղի գոլերը։

Չնայած դրամատիկ ավարտին՝ ոչ ոքին բավարար էր «Նոայի» համար հաջորդ փուլ անցնելու համար։

Հաջորդ փուլում Հայաստանի չեմպիոնը կմրցի Հունգարիայի չեմպիոն «Ֆերենցվարոշի» հետ, որի կազմում խաղում է Հայաստանի հավաքականի ֆուտբոլիստ Էդգար Սևիկյանը։ Առաջին հանդիպումը կկայանա հուլիսի 22-ին՝ Հայաստանում։