«Նոա»-ն պատմական փլեյ-օֆֆում հաղթեց «ԱԶ»-ին (ՏԵՍԱՆՅՈՒԹ)

Երևանի «Նոա»-ն պատմական հաղթանակ տարավ Նիդերլանդները ներկայացնող «ԱԶ»-ի նկատմամբ՝ 1:0 հաշվով, Կոնֆերենցիաների լիգայի 1/16 եզրափակչի առաջին խաղում։

Խաղի ելքը որոշվեց Հովհաննես Համբարձումյանի 52-րդ րոպեին խփած դիպուկ հարվածով։ 34-ամյա հայ պաշտպանը Էլդեր Ֆերեյրայի փոխանցումից հետո գերազանց ավարտեց գրոհը և ապահովեց նվազագույն առավելություն պատասխան հանդիպումից առաջ։ Համբարձումյանի համար սա եվրագավաթային մրցաշարերում 45-րդ խաղն էր։

ՏԵՍԱՆՅՈՒԹ՝

Պատասխան հանդիպումը կկայանա փետրվարի 26-ին Ալկմարում, որտեղ էլ կպարզվի 1/8 եզրափակչի ուղեգիր նվաճած թիմը։

Նշենք, որ «ԱԶ»-ը ունի կադրային կորուստներ․ կենտրոնական պաշտպան Վաուտեր Գուսը դեղին քարտ ստացավ և կբացակայի պատասխան խաղից։

«Նոա»-ի կազմում ևս կան մտահոգություններ Նիդերլանդներ մեկնելուց առաջ։ Երկրորդ խաղակեսում վնասվածքների պատճառով խաղադաշտը լքեցին Գուստավո Սանգարեն, Էլդեր Ֆերեյրան և Նատանիել Սեյնտինին։ Նրանց վնասվածքների լրջության աստիճանը կպարզվի մոտ օրերս։

Այս հանդիպումը դարձավ հայկական ակումբի առաջինը եվրագավաթների փլեյ-օֆֆում և միանգամից բերեց առաջին հաղթանակը նման բարձր փուլում։