«Անհնարին ոչինչ չկա». «Նոայի» ֆուտբոլիստները՝ «ԱԶ»-ի դեմ հանդիպման մասին

Հայկական «Նոա» ակումբի ֆուտբոլիստներ Նարդին Մուլահուսեյնովիչը և Հովհաննես Համբարձումյանը UEFA-ին տված հարցազրույցում կիսվել են Կոնֆերենցիաների լիգայի 1/16 եզրափակչի առաջիկա խաղի սպասումներով՝ ընդդեմ նիդերլանդական «ԱԶ Ալկմար»-ի։

Առաջին հանդիպումը կկայանա փետրվարի 19-ին Երևանում և կմեկնարկի տեղական ժամանակով 21:45-ին։ Այս խաղը պատմական կլինի՝ առաջին անգամ հայկական ակումբը հանդես կգա եվրագավաթների փլեյ-օֆֆ փուլում։

«Նոայի» պաշտպան Հովհաննես Համբարձումյանը ընդգծել է ձեռք բերված արդյունքի կարևորությունը.

«Մենք արդեն մտել ենք հայկական ակումբային ֆուտբոլի և հենց «Նոայի» պատմության մեջ՝ երկու տարի անընդմեջ դուրս գալով Կոնֆերենցիաների լիգայի հիմնական փուլ, իսկ այս տարի՝ նաև փլեյ-օֆֆ։ Սա շատ լավ արդյունք է, բայց մենք պետք է շարունակենք առաջ շարժվել և քրտնաջան աշխատել՝ ավելիին հասնելու համար։ Մեզ սպասում է լուրջ և ուժեղ մրցակից, սակայն անհնարին ոչինչ չկա»։

«Նոայի» հարձակվող Նարդին Մուլահուսեյնովիչը, որը մրցաշարի հիմնական փուլի հերոսներից մեկն էր, նշել է, որ թիմը պատրաստ է լուրջ մարտահրավերի.

«Ես հարձակվող եմ, և իմ գործը գոլեր խփելն է։ Ուրախ եմ, որ իմ գոլերը օգնեցին մեզ լավ արդյունքներ գրանցել և այս գարնանը շարունակել ելույթները Եվրոպայում։ Մենք շատ եվրոպական ֆուտբոլ ենք դիտում և լավ ճանաչում ենք «ԱԶ»-ի բազմաթիվ խաղացողների։ Ես լավատես եմ տրամադրված։ Այս մրցաշրջանում մենք անցկացրել ենք մի քանի շատ ծանր հանդիպումներ եվրոպական թիմերի դեմ, որտեղ կարողացել ենք հաղթել կամ ոչ-ոքի խաղալ։ Պետք է պահպանենք վստահությունը և ցույց տանք մեր առավելագույնը»։

Հարձակվողը հավելել է.

«Յուրաքանչյուր խաղի ես դուրս եմ գալիս հաղթելու մտադրությամբ։ Ես հավատում եմ այս թիմին և մեր որակին։ Անհնար է կանխատեսել, թե որքան հեռու կգնանք, բայց մեր խնդիրն է փորձել դա պարզել։ Կարող եմ խոստանալ, որ մենք կտանք մեր բոլոր ուժերը։ Ֆուտբոլում ամեն ինչ հնարավոր է, հատկապես փլեյ-օֆֆում՝ մեկ կամ երկու խաղում կարող է տեղի ունենալ ամեն ինչ»։

Նշենք, որ ձմեռային տրանսֆերային պատուհանի ընթացքում Մուլահուսեյնովիչի շուրջ իսկական պայքար էր ծավալվել։ Կոնֆերենցիաների լիգայի հիմնական փուլի լավագույն ռմբարկուն (5 գոլ և 1 գոլային փոխանցում) հայտնվել էր Լեհաստանի, ԱՄՆ-ի, Շոտլանդիայի, Ռուսաստանի և այլ երկրների ակումբների ուշադրության կենտրոնում։ Սակայն այս պահին հարձակվողը շարունակում է հանդես գալ «Նոայում» և կենտրոնացած է «ԱԶ»-ի դեմ պատմական դիմակայության վրա, որը հայկական ֆուտբոլի համար նոր էջ կբացի եվրագավաթներում։

«Այս պայքարը՝ Հայաստանի համար». «Նոայի» նախագահի ուղերձը «ԱԶ»-ի դեմ խաղից առաջ

Իսրայելից խիստ մրցավարը կսպասարկի «Նոա» — «ԱԶ Ալկմար» հանդիպումը