Անհավանական խաղ Գյումրիում ավարտվեց «Նոայի» հաղթանակով (ՏԵՍԱՆՅՈՒԹ)

Հայաստանի առաջնության առաջատար «Նոան» ծանր հաղթանակ տարավ արտագնա խաղում՝ «Շիրակի» դեմ։ Դարպասապահի ֆանտաստիկ խաղն ու Միսակյանի անհավանական գոլը չփրկեցին տանտերերին պարտությունից։ Հանդիպումն ավարտվեց 2:1 հաշվով՝ «Նոայի» օգտին։

Առաջին խաղակեսում «Շիրակի» սերբ դարպասապահ Դարկո Վուկասինովիչը երկու անգամ հետ մղեց 11-մետրանոց հարվածները, որոնք կատարում էր առաջնության լավագույն ռմբարկու Գոնսալու Գրեգորյուն։

«Շիրակի» կիսապաշտպան Ռաֆիկ Միսակյանը հեռահար հարվածով գեղեցիկ գոլի հեղինակ դարձավ, որը հնարավորություն տվեց իր թիմին ընդմիջման գնալ առավելությամբ։ Սակայն «Նոայի» ավագ Հովհաննես Համբարձումյանը երկրորդ խաղակեսի մեկնարկում անկյունայինից գլխի հարվածով հավասարեցրեց հաշիվը։

VIDEO:

Այնուհետև «Նոան» ակտիվորեն հարձակվում էր, ստեղծում պահեր, սակայն «Շիրակը» վստահ պաշտպանվում էր, իսկ Վուկասինովիչը շարունակում էր հրաշքներ գործել դարպասում։

86-րդ րոպեին մրցավարը կրկին միջամտեց հանդիպման ընթացքին՝ երրորդ 11-մետրանոցը նշանակելով «Շիրակի» դարպասին։ Այս անգամ հարվածն իրականացրեց Գոռ Մանվելյանը՝ վստահորեն գոլի վերածելով այն և ապահովելով «Նոայի» հաղթանակը։

24 տուրից հետո «Նոան» առաջնությունում 52 միավորով առաջատարն է՝ 5 միավորով գերազանցելով «Ուրարտուին»։ «Շիրակը» 25 միավորով 7-րդ հորիզոնականում է։