«Նոայի» հարձակվող Գոնսալու Գրեգորիուն չի խաղա մինչև տարվա վերջ

«Նոայի» հարձակվողը և անցած մրցաշրջանի Հայաստանի առաջնության լավագույն ռմբարկուն Գոնսալու Գրեգորիուն ստացել է ծունկի խաչաձև կապանների լուրջ վնասվածք և նվազագույնը երեք ամսով դուրս մնացել կազմից։ Այդպիսով, հավանական է, որ պորտուգալացին այլևս դաշտ դուրս չգա 2025 թվականին։

Այս կորուստի պատճառով ակումբը շտապորեն ուժեղացնում է հարձակման գիծը և պայմանագիր է ստորագրում բոսնիացի հարձակվող Նարդին Մուլահուսեյնովիչի հետ։

30-ամյա Գրեգորիուն անցած մրցաշրջանում բոլոր մրցաշարերում խփել է 27 գոլ և դարձել «Նոայի» հարձակման առանցքային ֆիգուրը։ Երեկ կայացած Չեմպիոնների լիգայի երկրորդ որակավորման փուլի «Ֆերենցվարոշի» դեմ հանդիպմանը նա չկարողացավ մասնակցել հենց վնասվածքի պատճառով։ Սակայն մարզչական շտաբը խաղացողին ընդգրկել է հայտացուցակում՝ մրցակցից տեղեկությունը թաքցնելու համար։

Կենտրոնական հարձակվողի դիրքում խաղը սկսել է բրազիլացի Մատեուս Այյաշը, որը դարձավ գոլի հեղինակ։ Երկրորդ կեսում այդ դերում հանդես է եկել անվանական վինգեր Մարին Յակոլիշը։

Գրեգորիուի վնասվածքը լուրջ հարված է «Նոայի» համար, սակայն Բոսնիայի չեմպիոն «Զրինսկիից» Մուլահուսեյնովիչի ձեռքբերումը պետք է օգնի ակումբին փոխհատուցել հարձակման առաջնորդի կորուստը։