Նաիր Տիկնիզյանը չի խաղա ՌՊԼ-ի եզրափակիչ տուրում. ֆուտբոլիստի որոշումը

Մոսկվայի «Լոկոմոտիվի» և Հայաստանի հավաքականի կիսապաշտպան Նաիր Տիկնիզյանը բաց կթողնի Ռուսաստանի Պրեմիեր լիգայի վերջին տուրի հանդիպումը «Ակրոնի» դեմ։ Ֆուտբոլիստը չի մեկնել թիմի հետ Սամարա։

Ինչպես հայտնել է խաղացողի գործակալ Ալեքսանդր Կլյուևը, այսպիսի որոշում կայացրել է հենց Տիկնիզյանը։

Ավելի վաղ ֆուտբոլիստը դժգոհություն էր հայտնել ակումբում ստեղծված իրավիճակից։ ՑՍԿԱ-ի դեմ 29-րդ տուրի խաղից հետո, որում նա կրկին մնաց պահեստում, Տիկնիզյանը հուզականորեն ասել էր, որ իրեն զգում է «վերջին աղբը» և մտադիր է ամռանը փոխել ակումբը։ Կիսապաշտպանը նշել էր, որ արդեն երեք խաղ անընդմեջ չի հայտնվում խաղադաշտում՝ չնայած վնասվածք չունենալուն և հայտացուցակում լինելուն։ Նա նաև խոստովանել էր, որ հիասթափված է վստահության պակասից և հայտնել էր, որ ցանկանում է առաջ շարժվել։

«Այսօր ես նույնիսկ ռոտացիայի խաղացող չեմ։ Պետք է դա արժանապատվորեն ընդունել և առաջ շարժվել», — ասել էր Տիկնիզյանը։

Այժմ իրավիճակը, կարծես, հասել է կուլմինացիայի. Նաիրը անձամբ հրաժարվել է մասնակցել մրցաշրջանի վերջին խաղին։ Նրա ապագան «Լոկոմոտիվում» մնում է անորոշ, և ամենայն հավանականությամբ, բաժանումը ակումբից սպասվում է առաջիկա շաբաթներին։

«Ինձ չեն հեռացրել ոչ մարզումային գործընթացից, ոչ էլ առաջիկա խաղից։ Ես ղեկավարության հետ զրույց եմ ունեցել, որի ընթացքում արտահայտել եմ իմ դիրքորոշումը իմ ապագայի վերաբերյալ։ Նրանք դա ընդունեցին, այդ պատճառով էլ ես չեմ մեկնում խաղին։ Բայց ինձ ոչ ոք չի հեռացրել, ակումբի և ղեկավարության հետ ոչ մի կոնֆլիկտային իրավիճակ չկա», – ասել է Նաիր Տիկնիզյանը «Սպորտ Էքսպրես»-ին տված հարցազրույցում։