«Մենք հեշտ որս չենք լինի ԵՎՐՈ-2026-ում» — Ռուբեն Նազարեթյան

Հայաստանի ֆուտզալի ազգային հավաքականի գլխավոր մարզիչ Ռուբեն Նազարեթյանը կիսվել է իր տպավորություններով պատմական ձեռքբերումից հետո՝ թիմի՝ Եվրոպայի 2026 թ. առաջնություն դուրս գալու կապակցությամբ, ինչպես նաև խոսել է հետագա ծրագրերի մասին։

Հիշեցնենք, որ Հայաստանի հավաքականը ԵՎՐՈ-2026-ի ուղեգիր է նվաճել ուղիղ՝ զբաղեցնելով 6-րդ խմբի առաջին տեղը։ Որակավորման վերջին խաղում հայկական թիմը 4:2 հաշվով հաղթեց Ղազախստանին և խմբային փուլն ավարտեց 16 միավորով։

Պատմական հաջողություն՝ առանց նատուրալիզացված խաղացողների

Բոլոր 6 հանդիպումներում Հայաստանի հավաքականը խաղացել է առանց բրազիլացի լեգիոներների, որոնց արգելվել է հանդես գալ ազգային թիմում նոր նատուրալիզացման կանոնների պատճառով։ Այժմ յուրաքանչյուր լեգիոներ պետք է նվազագույնը 5 տարի հանդես գա երկրի առաջնությունում, որպեսզի ստանա ազգային թիմում խաղալու իրավունք։ Արդյունքում, թիմում չեղան երկարամյա դարպասապահ Լուան Մյուլլերը, ով 2024 թվականին ճանաչվել էր աշխարհի լավագույն դարպասապահ, ինչպես նաև մի քանի այլ նատուրալիզացված բրազիլացիներ։

Այնուամենայնիվ, հայկական թիմը կարողացավ հասնել աննախադեպ արդյունքի՝ առաջին անգամ ապահովելով մասնակցությունը խոշոր միջազգային մրցաշարում։

Գլխավոր մարզիչ Ռուբեն Նազարեթյանի խոսքը

«Մենք պատրաստ ենք ցանկացած սցենարի՝ բրազիլացիներով, թե առանց նրանց։ Վերջին 6 տարիներին մենք հսկայական աշխատանք ենք կատարել, որպեսզի նման խնդիրները մեզ չխանգարեն։ Ամեն դեպքում, բոլոր բրազիլացի խաղացողները, որոնք հանդես են եկել Հայաստանի հավաքականում, մեր ընտանիքի մասն են դարձել։ Հավանաբար առանց նրանց մենք այս հաջողություններին չէինք հասնի։ Մեր խաղացողները մարզվել են նրանց հետ, խաղացել նրանց կողքին և շատ բան սովորել նրանցից։ Մենք շնորհակալ ենք բրազիլացիներին, բայց այսօր ես հպարտ եմ հատկապես այն տղաներով, ովքեր խաղացին վերջին հանդիպումներում։ Նրանք հավատացին մեզ, մեր նախագծին և մեզ հետ գնացին մինչև վերջ՝ ապահովելով այս հաջողությունը։

Բացի այդ, ուզում եմ շնորհակալություն հայտնել Հայաստանի ֆուտբոլի ֆեդերացիայի նախագահ Արմեն Մելիքբեկյանին։ Նա հավատաց իմ ֆուտզալի զարգացման ծրագրին և օգնել է այն կյանքի կոչել։ Վեց տարի առաջ մեր ֆուտզալը պարզապես գոյատևում էր։ Բայց ես տեսնում էի ղեկավարության աջակցությունը, և մեզ մոտ ամեն ինչ ստացվեց։

Մենք ԵՎՐՈ-2026 ենք մեկնում ոչ թե պարզապես մասնակցելու համար։ Մենք չենք պատրաստվում այնտեղ պարզապես մասնակցել և դառնալ մյուս թիմերի հեշտ որսը։ Այսօր մենք հաղթեցինք Եվրոպայի երկրորդ հավաքականին՝ սա արդեն շատ բան է ասում։ Մենք պատրաստ ենք ավելինին և դա ցույց կտանք Եվրոպայի առաջնությունում»։

ԵՎՐՈ-2026-ը ֆուտզալի Եվրոպայի առաջնությունը կանցկացվի երկու քաղաքներում՝ Ռիգայում և Կաունասում, 2026 թվականի հունվարի 16-ից մինչև փետրվարի 8-ը։ Մրցաշարին կմասնակցի 16 հավաքական։ Ներկայումս հայտնի է 5 թիմի մասնակցությունը՝ Լիտվա, Լատվիա, Պորտուգալիա, Չեխիա և Հայաստան։