Հայաստանի տղամարդկանց և կանանց U18 հավաքականները դուրս եկան Եվրոպայի առաջնության (C դիվիզիոն) կիսաեզրափակիչ

Հայաստանի տղամարդկանց և կանանց U18 հավաքականները հաջողությամբ հաղթահարեցին Եվրոպայի բասկետբոլի առաջնության C դիվիզիոնի խմբային փուլը և դուրս եկան մրցաշարի կիսաեզրափակիչ։

Կանանց Հայաստանի U18 հավաքականը խմբային փուլի վերջին տուրում ջախջախեց Անդորրայի U18 թիմին՝ 82:35 հաշվով։ Խաղի առաջատարն էր Սեդա Գաբրիելյանը, ով գրանցեց դաբլ-դաբլ՝ 23 միավոր, 11 ռիբաունդ, ինչպես նաև 6 փոխանցում, 3 գնդակի խլում և 1 բլոկշոտ։ Հայաստանը խմբում զբաղեցրեց առաջին տեղը՝ վստահ հաղթանակներ տանելով Ալբանիայի և Անդորրայի նկատմամբ։ Մրցաշարը անցկացվում է Անդորրայում։

Տղամարդկանց Հայաստանի U18 հավաքականը խմբային փուլի վերջին տուրում առավելության հասավ Գիբրալթարի U18 թիմի նկատմամբ՝ 81:48 հաշվով։ Խաղի ամենաարդյունավետ խաղացողը դարձավ Սեբաստիան Ացակորզյանը՝ 20 միավորով, 8 ռիբաունդով, 1 փոխանցումով, 3 գնդակի խլումով և 3 բլոկշոտով։ Հայկական թիմը խմբում գրավեց երկրորդ տեղը՝ պարտվելով միայն Կիպրոսին (63-69), սակայն հաղթելով Սան Մարինոյին, Գիբրալթարին և Մոնակոյին։ Մրցաշարը անցկացվում է Ալբանիայում։

Հուլիսի 26-ին կկայանան Եվրոպայի առաջնության (C դիվիզիոն) կիսաեզրափակիչները․

• Տղամարդկանց Հայաստանի U18 հավաքականը կմրցի Լյուքսեմբուրգի U18 թիմի հետ, իսկ մյուս զույգում Կիպրոսի U18 և Անդորրայի U18 հավաքականները կհանդիպեն միմյանց։

• Կանանց Հայաստանի U18 հավաքականը կմրցի Մալթայի U18 թիմի հետ, իսկ մյուս խաղում կհանդիպեն Վրաստանի U18 և Ալբանիայի U18 հավաքականները։

Հայաստանի երիտասարդ տղաներն ու աղջիկները պահպանում են գերազանց շանսեր դուրս գալու եզրափակիչ և պայքարելու մրցաշարի ոսկե մեդալների համար։