Մուսաեւը չի բացառել Սպերցյանի հեռացումը արդեն հաջորդ մրցաշրջանի ընթացքում

«Կրասնոդարի» գլխավոր մարզիչ Մուրադ Մուսաեւը Sports.ru-ին տված հարցազրույցում ամփոփել է չեմպիոնական մրցաշրջանը եւ կիսվել մոտակա ապագայի ծրագրերով։ Հիմնական թեմաներից մեկը եղել է կիսապաշտպան Էդուարդ Սպերցյանի հնարավոր տրանսֆերը։

Մուսաեւը խոստովանել է, որ ակումբը ակտիվորեն աշխատում է կազմը ուժեղացնելու ուղղությամբ եւ հատկապես կարիք ունի կենտրոնական գոտու ամրապնդման, նույնիսկ եթե Սպերցյանը մնա թիմում։

«Մեզ անհրաժեշտ է ևս մեկ խաղացող կիսադաշտի համար։ Նույնիսկ եթե Սպերցյանը մնա», — ընդգծել է մարզիչը։

Նրա խոսքով՝ «Կրասնոդարում» կան խաղացողներ, ովքեր կարող են փոխարինել հայ կիսապաշտպանին, բայց նրանց խաղային դիրքերը մի փոքր տարբերվում են.

«Այդ դիրքում ունենք Կրիվցովին ու Կոզլովին։ Երբ Սպերցյանը վնասվածք ստացավ գարնան սկզբին, Նիկիտան լավ փոխարինեց նրան, թեեւ նա իրեն ավելի հարմար է զգում ութ համարի դիրքում՝ հաճախ լինելով գնդակի հետ»։

Մարզիչը ընդգծել է, որ Սպերցյանի ապագան կախված է ստացված առաջարկներից եւ չի բացառել, որ տրանսֆերը կարող է տեղի ունենալ հենց մրցաշրջանի ընթացքում՝

«Ամեն ինչ առաջարկից է կախված։ Չի բացառվում, օրինակ, որ Սպերցյանը հեռանա հենց մրցաշրջանի ընթացքում՝ օգոստոսին, տրանսֆերային պատուհանի փակվելուց մեկ շաբաթ առաջ»։

Լրագրողի հարցին՝ արդյոք նման սցենարը համապատասխանում է ակումբի փիլիսոփայությանը, հաշվի առնելով, որ «Կրասնոդարը» ավանդաբար շեշտը դնում է կայունության եւ երկարաժամկետ մոտեցման վրա, Մուսաեւը պատասխանել է, որ ներկայիս տրանսֆերային շուկան պահանջում է ճկունություն՝

«Հիմա կլինի Աշխարհի ակումբային առաջնություն, ուստի պետք է պատրաստ լինենք այն բանին, որ Էդոյով հետաքրքրված ակումբները շատ արագ չեն գործի»։

Այսպիսով, «Կրասնոդարը» բաց է տարբեր տարբերակների համար եւ չի բացառվում, որ թիմը կորցնի իր առանցքային խաղացողներից մեկին հենց ամառային տրանսֆերային պատուհանի վերջում։ Միեւնույն ժամանակ ակումբը շարունակում է որոնումները, որպեսզի պատրաստ լինի նոր մարտահրավերների, այդ թվում՝ եվրագավաթներին եւ ԱԱ ակումբային առաջնության հնարավոր ազդեցությանը։

Հիշեցնենք, որ ավելի վաղ հաղորդվել էր, թե «Պորտուն» հետաքրքրված է Սպերցյանի ծառայություններով։

Էդուարդ Սպերցյանը դարձավ Ռուսաստանի չեմպիոն 2024/25 մրցաշրջանում եւ անմիջապես հետո հայտարարեց, որ պատրաստ է տեղափոխվել Եվրոպա։