Մուսա Եվլոևը իր երազանքների թիմում ընդգրկել է Արթուր Ալեքսանյանին. «Ես այդպես չէի կարողանա»

Օլիմպիական չեմպիոն Մուսա Եվլոևը «Բոռբա+» փոդքասթում Տիգրան Ավանյանի հետ խոսակցության ընթացքում կազմել է իր երազանքների թիմը՝ աշխարհի բոլոր ժամանակների լավագույն հունահռոմեական ոճի ըմբիշներից՝ ըստ քաշային կարգերի։ 97 կգ քաշային կարգում ռուս ըմբիշը ընդգծեց, որ ընտրել է ոչ թե իրեն, այլ հայ չեմպիոն Արթուր Ալեքսանյանին՝ նշելով նրա բացառիկ կայունությունն ու երկարամյա կարիերան աշխարհի բարձրագույն մակարդակում։

«97 կգ՝ Արթուր Ալեքսանյան, որովհետև Արթուրը արդեն 2011 թվականից մինչև հիմա պահում է այդ մակարդակը։ Ես հիանում եմ Արթուրով, որովհետև եթե ես լինեի, այդպես չէի կարողանա, չէի մասնակցի։ Արթուրը երբեք չի կորցնում այդ բարձր մակարդակը, այդ պատճառով միանշանակ՝ Արթուր Ալեքսանյան», — ասել է Եվլոևը։

Այս գնահատականն առավել արժեքավոր է՝ հաշվի առնելով երկու ըմբիշների անձնական հակամարտությունների պատմությունը։ Մեծ մրցաշարերում Եվլոևն ավելի հաճախ է հաղթել.

• Օլիմպիադա 2020, եզրափակիչ՝ Եվլոև — Ալեքսանյան 5:1

• Աշխարհի գավաթ 2020 (Սերբիա), որակավորում՝ Եվլոև — Ալեքսանյան 5:1

• ԱԱ-2019, կիսաեզրափակիչ՝ Եվլոև — Ալեքսանյան 5:0

• ԱԱ-2018, կիսաեզրափակիչ՝ Եվլոև — Ալեքսանյան 3:1

• ԱԱ-2017, եզրափակիչ՝ Ալեքսանյան — Եվլոև 3:1

Չնայած այս ամենին, Մուսա Եվլոևի «երազանքների թիմում» տեղ է գտել հենց Արթուր Ալեքսանյանը՝ իր անգերազանցելի երկարակեցության շնորհիվ հունահռոմեական ըմբշամարտի էլիտայում։

Բացի այդ, Եվլոևի թիմում ընդգրկվել է ևս մեկ հայ ըմբիշ, որը հանդես է եկել Ռուսաստանի հավաքականի կազմում՝ Վարդերես Սամուրգաշևը։

Մուսա Եվլոևի երազանքների թիմը.

• 55 կգ՝ Նազիր Մանկիև (Ռուսաստան)

• 60 կգ՝ Իսլամբեկ Ալբիև (Ռուսաստան)

• 63 կգ՝ Վարդերես Սամուրգաշև (Ռուսաստան)

• 67 կգ՝ Սաիդ Էսմաեիլի (Իրան)

• 72 կգ՝ Աբույազիդ Մանցիգով (Ռուսաստան)

• 77 կգ՝ Ռոման Վլասով (Ռուսաստան)

• 82 կգ՝ Սելչուք Չեբի (Թուրքիա)

• 87 կգ՝ Համզա Երլիկայա (Թուրքիա)

• 97 կգ՝ Արթուր Ալեքսանյան (Հայաստան)

• 130 կգ՝ Ալեքսանդր Կարելին (Ռուսաստան)