Մուլահուսեյնովիչը մոտ է «Նոայից» հեռանալուն․ «Պոգոն» համաձայնության է հասել 1 մլն եվրոյի տրանսֆերի շուրջ

«Նոայի» հարձակվող Նորդին Մուլահուսեյնովիչը, հավանաբար, կշարունակի կարիերան Լեհաստանի առաջնությունում։ Լեհ լրագրող Կամիլ Գլեմբոցկու (kanalsportowy.pl) տեղեկություններով՝ լեհական «Պոգոն Շչեցինը» համաձայնության է հասել 28-ամյա բոսնիացու տրանսֆերի շուրջ՝ առաջ անցնելով «Ռակուվից»։

Հաղորդվում է, որ հայկական ակումբը կստանա 1 մլն եվրո, ինչպես նաև ֆուտբոլիստի ապագա վաճառքից 20%։

«Նոան» Մուլահուսեյնովիչին ձեռք էր բերել 2025 թվականի ամռանը «Զրինյսկի Մոստարից» 230 հազար եվրոյով։ Այսպիսով, երևանյան ակումբը կարող է ընդամենը կես տարվա ընթացքում ավելի քան չորս անգամ վերադարձնել իր ներդրումը։

Մուլահուսեյնովիչը դարձավ եվրագավաթային մրցաշարի իսկական բացահայտում։ Նա դարձավ Կոնֆերենցիաների լիգայի լիգայական փուլի լավագույն ռմբարկուն՝ խփելով 5 գոլ և կատարելով 1 գոլային փոխանցում։ Բոսնիացին մասնակցել է իր թիմի բոլոր գոլերին այս փուլում և օգնել «Նոային» պատմություն կերտել՝ դառնալով առաջին հայկական ակումբը, որը դուրս է եկել մրցաշարի փլեյ-օֆֆ։

Ընդհանուր առմամբ հայկական թիմի կազմում նա անցկացրել է 25 հանդիպում՝ խփելով 9 գոլ և կատարելով 4 արդյունավետ փոխանցում։

Ձմռանը Մուլահուսեյնովիչի նկատմամբ հետաքրքրություն էին ցուցաբերում ակումբներ ԱՄՆ-ից, Իտալիայից, Չեխիայից, Շոտլանդիայից և Ռուսաստանից։ Մասնավորապես, Կազանի «Ռուբինը» առաջարկել էր ավելի բարձր գումար՝ 1.5 մլն եվրոյից սկսած։ Սակայն ֆուտբոլիստը հրաժարվել է ռուսական ակումբ տեղափոխվելուց։

Եթե գործարքը մոտ օրերս պաշտոնապես հաստատվի, «Նոան» կկորցնի իր առանցքային խաղացողներից մեկին, սակայն կստանա լուրջ ֆինանսական փոխհատուցում և ապագա վաճառքից տոկոս։

Դեռևս հայտնի չէ՝ կկարողանա՞ նա մասնակցել Կոնֆերենցիաների լիգայի 1/16 եզրափակչի պատասխան խաղին «ԱԶ»-ի դեմ։ Հիշեցնենք, որ առաջին խաղում հայկական թիմը հաղթել է 1-0 հաշվով, իսկ պատասխան հանդիպումը կկայանա փետրվարի 26-ին։