Հայաստանի երիտասարդական հավաքականը պարտվեց Ռուսաստանին երկրորդ ընկերական հանդիպմանը

Մինչև 20 տարեկանների Հայաստանի բասկետբոլի հավաքականը շարունակում է նախապատրաստությունը B դիվիզիոնի Եվրոպայի առաջնությանը, որը կմեկնարկի հուլիսի 11-ին Երևանում։ Պատրաստության շրջանակում հավաքականը ընկերական խաղ անցկացրեց Ռուսաստանի հասակակիցների դեմ և կրեց խոշոր հաշվով պարտություն՝ 45:90։

Հայաստանի հավաքականի մեկնարկային հնգյակը կազմել էին Գրեգորի Ղազարյանը, Ամարի ՄաքՔոուլը, Դանիել Սանամյանը, Դանիել Քիրակոսյանը և Յուրա Մելիքյանը։ Ռուսաստանի թիմում խաղը սկսեցին Պիվցայկինը, Բելովը, Ստոլբեցկին, Ռուբլյովը և Միրոնովը։

Հայաստանի հավաքականում ամենաարդյունավետը Դանիել Սանամյանն էր, ով վաստակեց 11 միավոր, կատարեց 4 անդրադարձ և 1 գոլային փոխանցում։ Թիմի մարզչական շտաբը լայնորեն կիրառեց ռոտացիա՝ փորձարկելով տարբեր տակտիկական տարբերակներ և խաղաժամանակ տրամադրելով բոլոր բասկետբոլիստներին։

Սա Հայաստանի և Ռուսաստանի երկրորդ հանդիպումն էր նախապատրաստական փուլում։ Նախորդ խաղում մեր թիմը ավելի վստահ էր հանդես եկել և պարտվել էր ավելի փոքր տարբերությամբ՝ 82:90։

Հայաստանի հավաքականին առջևում սպասում են ևս երկու ստուգողական խաղեր՝

Հուլիսի 6 — Հայաստան vs Շվեյցարիա («Միկա» մարզահամալիր)
Հուլիսի 9 — Հայաստան vs Վրաստան (Կարեն Դեմիրճյանի անվան մարզահամալիր)

Երկու խաղերն էլ կմեկնարկեն Երևանի ժամանակով 19:00-ին։