Արման Ծառուկյանի մենեջերը հերքել է Չենդլերի հետ մենամարտի մասին լուրերը

UFC-ի թեթև քաշային կարգի մարզիկ Արման Ծառուկյանի մենեջեր Դանիել Ռուբինշտեյնը հերքել է իր սանի և նախկին տիտղոսակիր Մայքլ Չենդլերի հնարավոր մենամարտի վերաբերյալ վերջին ժամանակների լուրերը։

Ավելի վաղ լրագրող Մանուկ Հակոբյանը հայտնել էր, որ ընթանում են բանակցություններ Ծառուկյան – Չենդլեր մենամարտի անցկացման վերաբերյալ, որը նախատեսվում է ապրիլի 12-ին՝ UFC 314 մրցաշարում։ Սակայն Ռուբինշտեյնը կտրականապես հերքել է այդ տեղեկությունը՝ նշելով, որ ոչ մի իրական բանակցություն չի եղել։

«Ոչ ոք քեզ այդ մասին չի ասել։ Ոչ մի ճամբարում իրական բանակցություններ չեն եղել այս մենամարտի վերաբերյալ։ Միակ փաստը, որ կա, այն է, որ Արմանը վերսկսել է մարզումները։ Իսկ այն, ինչ դուք, "լրագրողներդ", անում եք, պարզապես վտանգի տակ եք դնում մենամարտերի անցկացումը՝ հրապարակելով լրիվ ապատեղեկատվություն», – կոշտ արձագանքել է Ռուբինշտեյնը։

Այսպիսով, հնարավոր մենամարտի մասին տեղեկությունը մնում է չհաստատված։ Այնուամենայնիվ, մենեջերի հայտարարությունը չի բացառում նաև այն փաստը, որ այս մենամարտը ապագայում կարող է կայանալ։ Առայժմ մնում է սպասել UFC-ի և մարտիկների պաշտոնական հայտարարություններին։