Մելիքյանը Գյորի նկատմամբ տարած հաղթանակից հետո. «Մեր խաղը դեռ չի ավարտվել»

Եղիշե Մելիքյանը ամփոփել է ՈՒԵՖԱ-ի Կոնֆերենցիայի լիգայի երկրորդ որակավորման փուլի «Դյորի» հետ Երևանի խաղի արդյունքները։ Հանդիպումը կայացավ հուլիսի 24-ին և ավարտվեց հայկական թիմի 2։1 հաշվով հաղթանակով։

Եղիշե Մելիքյանի հետխաղային ասուլիսը

Խաղի մասին.
«Շնորհավորում եմ բոլորին հաղթանակի առթիվ։ Չեմ ուզում շատ խոսել արդյունքի մասին, քանի որ պայքարը դեռ շարունակվում է, սպասվում է պատասխան խաղ։ Իհարկե, հաճելի է հաղթել՝ դա ինքնավստահություն է հաղորդում։ Պատասխան խաղը լինելու է արտագնա, այնպես որ պետք է շատ լավ պատրաստվենք։

Տակտիկական տեսանկյունից լավ խաղացինք, մրցակցին շատ հնարավորություններ չտվեցինք և կարողացանք փակել նրանց ուժեղ կողմերը։ Հարձակման մեջ կարողացանք վտանգներ ստեղծել, բայց նաև եղան անհատական սխալներ, որոնց պատճառով հաճախ կորցնում էինք գնդակը։ Վերջնական փուլում չբավարարեց վարպետությունը՝ ավելի շատ կարող էինք խփել, եթե ավելի որակով ավարտեինք պահերը։ Ընդհանուր առմամբ, մենք ավելի շատ վտանգավոր պահեր ունեցանք, իսկ նրանք, այո, ավելի շատ էին տիրում գնդակին, բայց դա մեր պլանի մեջ էր մտնում։

Անչափ տհաճ գոլ ընդունեցինք՝ սեփական դարպասը խփելով, բայց սա ֆուտբոլ է՝ պատահում է։ Միլկովիչը շատ լավ հանդիպում անցկացրեց, իսկ ինքնագոլը պատահականություն էր։ Հնարավոր է՝ հոգնածության հետևանք։ Չի կարելի մեղադրել՝ կարևորն այն է, որ հաղթեցինք»։

Օտուբանջոն պահեստում թողնելու որոշման մասին.
«Այսօր որոշել էինք խաղալ մեկ հարձակվողով և երկու վինգերով։ Վարեյկան և Մորենոն լավ վինգերներ են, դրա համար մեկնարկեցին նրանք։ Հարձակվողի դիրքի համար ընտրում էի Նուբիսիի և Օտուբանջոյի միջև։ Ընտրեցինք Նուբիսիին, բայց Յուսուֆը դուրս եկավ երկրորդ կեսում ու մեծ օգնություն ցուցաբերեց։ Ցավոք, չստացվեց իրացնել պահերը, ինչպես արդեն նշել էի։ Օտուբանջոն մեր առաջատարներից է, և պահեստում թողնելու որոշումը բացառապես տակտիկական էր՝ ոչ թե մրցակցության արդյունք»։

Մատաս Վարեյկայի մասին.
«Նա մեր առաջատարն է։ Լուրջ ֆուտբոլիստ է ու իսկական պրոֆեսիոնալ։ Նրա լավագույն տարբերակը դեռ առջևում է, որովհետև վնասվածք ուներ, բաց էր թողել նախապատրաստական փուլը և նոր է ձև հավաքում։ Նրա ներուժը հսկայական է»։

Գևորգ Տարախչյանի մասին.
«Տարախչյանը դեռ երիտասարդ է։ Նախորդ խաղերում մեկնարկային կազմում էր, բայց դեռ կայունության կարիք ունի։ Պետք է շատ բան սովորի՝ նման խաղերում միշտ մեկնարկում հայտնվելու համար։ Հիմա դեռ խաղը լավ չի կարդում, ամեն ինչ անում է փաստից հետո, բայց պետք է ավելի խելացի գործի։ Այս պահին լավ վիճակում է, պետք է աշխատենք նրա հետ»։

«Դյորի» ֆիզիկական պատրաստվածության մասին.
«Այո, «Դյորը» շատ հզոր թիմ է, իսկական մեքենա։ Նրանց նմանեցրի «Կալմարին» (2023-ին մենք երկուս անգամ հաղթել էինք այդ շվեդական թիմին)։ Արտագնա խաղը շատ բարդ է լինելու, նրանք ամբողջ ուժով առաջ կգնան, մենք էլ պետք է դիմանանք այդ ճնշմանը։ Մենք դեռ մեր լավագույն ֆիզիկական վիճակում չենք, իսկ մրցակիցը՝ այո»։

Տրանսֆերների մասին.
«Կարծում եմ՝ կազմը հիմնականում համալրված է։ Բայց գուցե դեռ 1-2 տեղ կա բաց։ Կտեսնենք որակ՝ տրանսֆեր կլինի միայն այն դեպքում, եթե իսկական ուժեղացում գտնենք։ Դժվար է հիմա ասել՝ կլինի թե ոչ։ Ամեն դեպքում ուզում եմ փակել 1-2 դիրք»։

Լուկաս Վիլելլայի վնասվածքի մասին.
«Այո, շատ ցավալի է, բայց, ցավոք, մինչև նոյեմբեր նրան չենք տեսնի։ Մեծ կորուստ է մեր համար»։

Դանիել Ագբալյանի մասին.
«Նա դեռ ամբողջությամբ չի հավաքել մարզավիճակը։ Շատ ուրախ եմ, որ նա թիմում է, բայց իր դիրքում կան ուժեղ մրցակիցներ, մեծ մրցակցություն կա։ Բնական է, որ ամեն անգամ մեկնարկում չի լինի, բայց այդ մրցակցությունը լավ է՝ ինչպես իր, այնպես էլ ամբողջ թիմի համար»։

Հայկական ֆուտբոլի զարգացման մասին.
«Իհարկե, Հայաստանի ներքին առաջնությունն աճել է, մրցակցությունը շատ ուժեղ է։ Ակումբների սեփականատերերը մեծ ներդրումներ են անում, որի համար շատ շնորհակալ եմ։ Դուք ինքներդ տեսնում եք՝ կարող ենք հավասար պայքարել ուժեղ թիմերի հետ և նույնիսկ հաղթել։ Սա շատ բան է ասում։ Նախկինում նման բան քիչ էր լինում, իսկ հիմա դուրս ենք գալիս խաղադաշտ՝ միայն հաղթանակի մասին մտածելով։ Ինչ վերաբերում է հավաքականին՝ Հայաստանը կարող է մրցել Հունգարիայի հետ։ Թերևս չենք հաղթի, բայց հավասար մրցակից ենք»։

Պաշտպանության խաղի մասին.
«Մրցակիցը պահեր ստեղծում էր հիմնականում երկար փոխանցումներով և քանակական առավելությամբ։ Այդպես ցանկացած թիմ կարող է անել, բայց դրա պատճառով նրանք բացում էին իրենց պաշտպանությունը։ Մենք հեշտությամբ կարող էինք հակագրոհներից վտանգավոր պահեր ստեղծել՝ և ստեղծում էինք, բայց անհատական վարպետությունը չբավարարեց դրանք իրացնելու համար։ Միակ գոլը ընդունեցինք մեր սխալի և անհաջողության արդյունքում, այնպես որ գոհ եմ պաշտպանների խաղից»։

Դավիթ Դավթյանի հեռանալու մասին.
«Չեմ կարող հստակ ասել՝ ինչու հեռացավ։ Բայց բաժանվեցինք ընկերական։ Մաղթում եմ նրան հաջողություն»։

Կարլեն Հովհաննիսյանի վերադարձի մասին.
«Շատ լավ ֆուտբոլիստ է, ուրախ եմ, որ վերադարձել է։ ԲԿՄԱ-ում անցկացրած երկու տարիները մեծ օգուտ տվեցին նրան՝ որպես ֆուտբոլիստ մեծացել է։ Նրան ասացի՝ մի քիչ պետք է սպասել, հետո խաղաժամանակ կստանա։ Առայժմ ռիսկային է դաշտ դուրս բերել։ Ամեն դեպքում, հույսերս նրա վրա եմ դնում և չեմ ցանկանում բաց թողնել»։

Վագներ Գոնսալվեսի մասին.
«Նա վարձակալությամբ է մեզ մոտ մինչև դեկտեմբեր, այնպես որ կշարունակի խաղալ։ Վագներն Աքիլեսի ջլի վնասվածք ուներ, շատ բան բաց թողեց, նման վնասվածքից հետո դժվար է միանգամից վերադառնալ նախկին մակարդակին։ Բայց միշտ հավատում եմ, որ նա կվերադառնա իր խաղին։ Այս պահին մրցակցությունը մեկնարկային կազմում նա դեռ պարտվում է, բայց շատ օգտակար է պահեստից մտնելով՝ այսօր էլ լավ խաղաց։ Ձմռանը կորոշենք՝ ինչ անել նրա ապագայի հարցում»։

Հենրի Ավագյանի վստահելի խաղի մասին.
«Գարնանը շատ ծանր տարա Ավագյանին կորցնելը։ Այն ժամանակ շատ կարևոր էր պահել նրան թիմում, բայց չստացվեց։ Ուրախ եմ, որ ուղղեցինք այդ սխալը ու վերադարձրինք։ Նա մեզ ինքնավստահություն է հաղորդում, շատ լավ մարդ է և դարպասապահ։ Շատ հաճախ փրկում է դարպասը գոլից՝ բայց դա նրա գործն է՝ եթե չփրկի, չի խաղա»։