Մարկո Ռոսսի. «Հայաստանի հետ պետք է խաղալ համբերատար և չկորցնել գլուխը»

Հունգարիայի ազգային հավաքականի գլխավոր մարզիչ Մարկո Ռոսսին Թելկիի մարզումային կենտրոնում կայացած մամուլի ասուլիսի ժամանակ ներկայացրեց իր ակնկալիքները Հայաստանի դեմ կայանալիք խաղից՝ 2026թ. աշխարհի առաջնության ընտրական փուլի շրջանակում։ Հանդիպումը տեղի կունենա հոկտեմբերի 11-ին Բուդապեշտում։

Իտալացի մասնագետը, որը նաև ունի հունգարական քաղաքացիություն, նշեց, որ դեռևս չի որոշել թիմի կազմը հարձակման գծում.

«Տղաները ամբողջ շաբաթ լավ են աշխատել, բայց դեռ մի քանի հարց կա, որոնց վերաբերյալ վերջնական որոշում չեմ ընդունել։ Պետք է որոշել, թե ով չի հայտավորվի, ինչպես նաև վերջնականապես ընտրել հարձակվողի՝ այդ որոշումը կընդունեմ վերջին մարզումից հետո», — ասել է Ռոսսին։

Մարզիչը ընդգծեց, որ իր թիմը դաշտ դուրս կգա առանց երկու առանցքային հարձակվողների՝ Բառնաբաշ Վարգայի և Ռոլանդ Շալայիի, որոնք բացակայում են որակազրկման պատճառով։ Թիմի երեք լավագույն ռմբարկուներից միայն ավագ Դոմինիկ Սոբոսլայն է մասնակցելու հանդիպմանը։

«Չարժե նայել անցյալ հանդիպումներին։ Եթե ցանկանում ենք հասնել փլեյ-օֆֆ փուլ, պարտավոր ենք այս խաղը հաղթել։ Պետք է վերահսկել գնդակը, թելադրել տեմպը, բայց խաղալ համբերատար։ Ամենակարևորը՝ չկորցնել գլուխը և կատարել մարզչական հրահանգները։ Եթե հարձակման և պաշտպանության մեջ գործենք միասնական, ապա կարող ենք հաղթել», — նշել է Ռոսսին։

Խոսելով մրցակցի մասին՝ Ռոսսին ընդգծեց, որ Հայաստանի հավաքականը մի քանի բարձրակարգ ֆուտբոլիստ ունի, սակայն հունգարացիները մանրամասն ուսումնասիրել են նրանց խաղը և գիտեն, թե ինչպես հակազդել։

Պաշտպան Քալլում Սթայլզը, որը նույնպես ներկա էր մամուլի ասուլիսին, նշեց, որ իրեն դժվար չի խաղալ այն դիրքում, որտեղ օգտագործում է Ռոսսին.

«Ես ինձ բազմակողմանի խաղացող եմ համարում։ Իմ կարիերայում բազմաթիվ անգամներ գործել եմ որպես հենակետային կիսապաշտպան։ Հայաստանը ուժեղ թիմ է, ինչը ապացուցեց Իռլանդիայի նկատմամբ հաղթանակով։ Բայց տանը մենք պետք է վերահսկենք խաղը և չթույլատրենք մրցակցին իրեն հարմարավետ զգալ», — ասել է Սթայլզը։

Հունգարիա - Հայաստան հանդիպումը կկայանա հոկտեմբերի 11-ին՝ Երևանի ժամանակով ժամը 20:00-ին, «Պուշկաշ Արենա» մարզադաշտում։

Մամուլի ասուլիս՝ Վահան Բիչախչյանի և Եղիշե Մելիքյանի մասնակցությամբ՝ Հունգարիա – Հայաստան խաղից առաջ։