Մարկո Ռոսի. «Հայաստանի դեմ հաղթելու համար պետք է պայքարենք յուրաքանչյուր մետրի համար»

Հունգարիայի ազգային հավաքականի գլխավոր մարզիչ Մարկո Ռոսին մամուլի ասուլիս է տվել Երևանում՝ 2026 թվականի աշխարհի առաջնության ընտրական Հայաստանի հետ խաղից առաջ։ Իտալացի մասնագետը նշել է, որ իր թիմին սպասվում է բարդ փորձություն, և որ չի կարելի թերագնահատել հայկական հավաքականը։

Թիմի միակ  խնդիրը մնում է հարձակվող Դոնատ Բարանին, որը շարունակում է անհատական մարզումները։

Ասուլիսի ընթացքում Ռոսին հարգանք է հայտնել Հայաստանի հավաքականին՝ ընդգծելով նրանց մարտական ոգին և արագ ու տեխնիկական խաղը.

«Հայաստանը ապացուցել է, որ նրա դեմ խաղալը շատ դժվար է՝ հիշենք թեկուզ Իռլանդիայի նկատմամբ նրանց հաղթանակը։ Մեր համար հիմարություն կլիներ թերագնահատել մրցակցին․ նրանք ունեն արագ և տեխնիկապես հմուտ ֆուտբոլիստներ, որոնք միանգամից պատժում են սխալների համար։ Մենք պետք է խաղանք ագրեսիվ, ճնշենք և չթողնենք նրանց ազատ տարածք։ Միայն հաղթանակը մեզ կպահպանի պայքարում աշխարհի առաջնության ուղեգրի համար։ Վստահ եմ՝ մեզ սպասվում է ծանր խաղ, բայց թիմը մոտիվացված է և պատրաստ մարտի», — ասել է Ռոսին։

Նման տրամադրվածություն ունի նաև պաշտպան Միլոշ Կերկեզը, որը խոսել է հայկական հավաքականի բնավորության մասին.

«Սա շատ միասնական թիմ է, իսկական մարտիկներ։ Յուրաքանչյուրը խաղում է իր գործընկերոջ համար, և դա զգացվում է։ Ուրախ եմ, որ Բարնաբաշ Վարգան և Ռոլանդ Շալայը վերադարձել են կազմ․ նրանց ներկայությունը վստահություն է հաղորդում բոլորին», — նշել է «Լիվերպուլի» ֆուտբոլիստը։

Հայաստան — Հունգարիա հանդիպումը տեղի կունենա հինգշաբթի՝ Երևանի Վազգեն Սարգսյանի անվան Հանրապետական մարզադաշտում։ Սկիզբը՝ ժամը 21:00։ Հանդիպումը կսպասարկի իսպանացի մրցավար Խոսե Մարիա Սանչեսը։

Խմբում Հունգարիան երկրորդ տեղում է՝ 5 միավորով, զիջելով Պորտուգալիային (10 միավոր)։ Հայաստանը 3 միավորով շարունակում է պայքարը, իսկ Իռլանդիան երրորդ տեղում է՝ 4 միավորով։