Մանվել Խնձրչյան և Արման Անդրեասյան – մեկնարկում են 2025 թվականի աշխարհի առաջնությունում

Այսօր՝ սեպտեմբերի 13-ին, Զագրեբում մեկնարկում է ազատ ոճի ըմբշամարտի աշխարհի առաջնությունը։ Առաջին օրը Հայաստանի հավաքականի կազմում հանդես կգան երկու մարզիկներ՝ Մանվել Խնձրչյան (61 կգ) և Արման Անդրեասյան (70 կգ)։

Առաջին օրվա մրցաշարային ծրագրում ընդգրկված են չորս քաշային կարգեր՝ 61, 70, 86 և 125 կգ։ Հայաստանը ներկայացված է միայն երկուսում։

24-ամյա Մանվել Խնձրչյանը անցկացնելու է իր երկրորդ մեծահասակների աշխարհի առաջնությունը՝ առաջինը եղել է 2022-ին։ Այս անգամ նա հանդես կգա մինչև 61 կգ քաշային կարգում։ Նախկինում Խնձրչյանը մրցում էր միայն մինչև 57 կգ քաշայինում, որը այժմ զբաղեցնում է Արսեն Հարությունյանը։

1/16 եզրափակչում նրա մրցակիցը կլինի 22-ամյա իտալացի Սիմոնե Պիրոդդուն, որին Խնձրչյանը վստահ հաղթել էր 2021 թ․ երիտասարդների Եվրոպայի առաջնությունում (11:0)։ Հաղթանակի դեպքում 1/8 եզրափակչում Մանվելի մրցակիցը կլինի օլիմպիական չեմպիոն, Ռուսաստանի ներկայացուցիչ Զաուր Ուգուևը։

25-ամյա Արման Անդրեասյանը (70 կգ) նույնպես կսկսի պայքարը 1/16 եզրափակչից։ Եվրոպայի 2024 թ․ չեմպիոնը հանդես է գալիս իր երրորդ մեծահասակների աշխարհի առաջնությունում։ Անցած տարի նա հանդես եկավ ոչ օլիմպիական քաշայինում և հասավ քառորդ եզրափակիչ, որտեղ պարտվեց ռուս Ինալ Շերիևին։ 2023-ին Արմանը նվաճեց բրոնզե մեդալ՝ զիջելով միայն ամերիկացի Զեյն Ռեթերֆորդին, բայց հաղթելով ճապոնացի Յասինոսուկե Աոյագիին, որի հետ հնարավոր է նորից հանդիպի կիսաեզրափակիչում։

Այսօր Զագրեբում նրա առաջին մրցակիցը կլինի 31-ամյա Վիկտոր Ռասսադինը (Տաջիկստան)՝ Ասիայի առաջնության կրկնակի արծաթե մեդալակիր։ 1/8 եզրափակչում Արմանը կմրցի Սերբիայի Վիկտոր Վոյնովիչի և Իրաքի Մոհամմեդ Կարիմի զույգի հաղթողի հետ։

Հավանական ծանր փորձություն սպասվում է քառորդ եզրափակչում, որտեղ մրցակից կարող է լինել Ասիայի 2024 թ․ չեմպիոն Ամիր Մոհամմեդ Յազդանին (Իրան) կամ Եվրոպայի վերջին առաջնության բրոնզե մեդալակիր Քենան Հեյբատովը (Ադրբեջան)։

Մրցումները կսկսվեն տեղական ժամանակով՝ ժամը 10:30-ին։