Մանուել Թուլիպա՝ «Ունիվերսիտատեա Կլուժի» հետ ոչ-ոքիից հետո․ «Մենք կարող ենք անցնել նրանց»

«Արարատ-Արմենիայի» գլխավոր մարզիչ Մանուել Թուլիպան ամփոփեց Կոնֆերենցիաների լիգայի որակավորման երկրորդ փուլի առաջին խաղը, որտեղ իր թիմը Երևանում ոչ-ոքի՝ 0:0 արդյունքով ընդունեց ռումինական «Ունիվերսիտատեա Կլուժին»: Պատասխան խաղը տեղի կունենա հուլիսի 31-ին՝ Կլուժում։

Մանուել Թուլիպայի հետխաղյա մամուլի ասուլիսը
«Երկրորդ խաղակեսում շատ լավ պայքարեցինք, և գոհ եմ, թե ինչպես հանդես եկանք այդ հատվածում, — նշեց Թուլիպան։ — Առաջին խաղակեսն այդքան լավ չէր տեմպի առումով, քանի որ մրցակցի ճնշման տակ հաճախ չէինք հասցնում ճիշտ որոշումներ կայացնել, բայց երկրորդ կեսում արդեն շտկեցինք դրությունը»։

Պորտուգալացի մասնագետը հատկապես ընդգծեց իր ֆուտբոլիստներից մեկի դերը․
«Երկրորդ կեսում մեր խաղացողները կարողացան գտնել Բալանտային դաշտում և փոխանցումներ կատարել նրան, իսկ նա շատ լավ է խաղում գնդակով, հիանալի է զարգացնում հարձակումը և կառավարում խաղի ընթացքը»։

Խոսելով տակտիկական դժվարությունների մասին՝ Թուլիպան մատնանշեց ժամանակի խնդիրը․
«Միակ բանը, որն ազդում է տակտիկայի վրա՝ այն է, որ քիչ ժամանակ եմ անցկացրել թիմի հետ։ Ժամանակ է պետք, որպեսզի թիմը լիովին կատարի իմ գաղափարները։ Բայց միևնույն ժամանակ այս խաղը ցույց տվեց, որ ավելի լավ ենք պատրաստված։ Բոլոր վիճակագրական տվյալներով առավելություն ունեինք, այնպես որ՝ ճիշտ ուղու վրա ենք»։

Թուլիպան զուսպ լավատեսությամբ է խոսում հաջորդ փուլ անցնելու հնարավորությունների մասին․
«Կարծում եմ՝ հավանականությունը 50/50 է։ "Ունիվերսիտատեա Կլուժը" շատ լավ թիմ է՝ անհատապես ուժեղ խաղացողներով, բայց մենք էլ վատը չենք, և վստահ եմ՝ կարող ենք անցնել նրանց»։