Մանուել Տուլիպա. «Ցանկանում ենք վերահսկել խաղը և չհարմարվել մրցակցին»

Երկրորդ որակավորման փուլի առաջին խաղից առաջ «Արարատ-Արմենիայի» գլխավոր մարզիչ Մանուել Տուլիպան մամուլի ասուլիս անցկացրեց, որը նվիրված էր ռումինական «Ունիվերսիտատեա Կլուժի» դեմ սպասվող խաղին։ Հանդիպումը կկայանա հուլիսի 24-ին Երևանում և կլինի պորտուգալացի մասնագետի պաշտոնական դեբյուտը հայկական ակումբի գլխավոր մարզչի պաշտոնում։

Մանուել Տուլիպայի նախախաղային ասուլիսը

«Սա կլինի իմ առաջին պաշտոնական հանդիպումը «Արարատ-Արմենիայի» գլխավորությամբ։ Մենք մեկ ամիս ունեինք պատրաստվելու համար և արեցինք ամեն ինչ՝ լավ մարզավիճակում խաղին մոտենալու համար։ Հասկանում ենք, որ մրցակիցն այժմ առավելություն ունի՝ նրանք պահել են իրենց նախկին մարզչին ու խաղացողների կորիզը, ինչը նշանակում է, որ ավելի խաղակցված են։ Բայց մեր նպատակը մեր խաղը թելադրելն է և գնդակի վերահսկումը», — ասաց Տուլիպան։

Նա ընդգծեց, որ թիմը միշտ գնում է հաղթանակի հետևից. «Քայլ առ քայլ առաջ ենք գնում։ Մեր մարզչական շտաբի նպատակը թիմի խաղը բարելավելն է և հաղթանակների հասնելը»։

Մինչև առաջին հանդիպումը «Արարատ-Արմենիան» կորցրել է նորեկ հարձակվող Պոլ Այոնգոյին՝ վնասվածքի պատճառով։

Առանձին անդրադառնալով Ժիրայր Շաղոյանի շուրջ ստեղծված իրավիճակին, ում վերջերս կապում են եվրոպական ակումբների հետ, Տուլիպան նշեց. «Մենք խոսել ենք նրա հետ։ Ամեն խաղացող ուզում է առաջադիմել և տեղափոխվել ավելի ուժեղ առաջնություն։ Ժիրայրը բարձր անհատական որակներ ունի, բայց պետք է դառնա ավելի թիմային խաղացող։ Միայն այդ դեպքում նա կարող է հասնել իր առավելագույնին։ Նա կարող է խաղալ երեք դիրքերում՝ երկու եզրերում և “տասը համարի” դերում»։

Խոսելով մրցակցի մասին՝ պորտուգալացին նշեց, որ «Ունիվերսիտատեա Կլուժն» ունի խաղային երկու մոդել. «Մենք ուսումնասիրել ենք նրանց խաղը, գիտենք՝ ում պետք է չեզոքացնել։ Բայց ամենակարևորն է մեր խաղը թելադրելը և չհարմարվել նրանցին»։

Տուլիպան նաև հայտնեց, որ անցյալ մրցաշրջանում մոտ էր Հայաստան գալուն. «Ես դիտել եմ 4–5 խաղ, տեսել եմ, որ այստեղ լավ ֆուտբոլիստներ կան։ Առաջնությունն ունի որակ՝ առնվազն հինգ թիմ համապատասխանում է եվրոպական միջին մակարդակին։ Ինձ համար սա նոր մարտահրավեր է՝ առաջին անգամ եմ աշխատում արտասահմանում»։

Ի վերջո, նա գոհունակություն հայտնեց թիմի կազմավորման աշխատանքներից. «Շատ գոհ եմ, բայց հավաքագրման գործընթացը շարունակվում է։ Մենք ուշադրություն ենք դարձնում ոչ միայն խաղային, այլև մարդկային հատկանիշներին»։

Արմեն Ամբարցումյան. «“Ունիվերսիտատեան” ուժեղ թիմ է, բայց մենք 100 տոկոսով պատրաստ ենք»