«Մանչեսթեր Յունայթեդ»-ը պաշտոնանկ արեց Ռուբեն Ամորիմին

«Մանչեսթեր Յունայթեդ»-ը պաշտոնապես բաժանվեց գլխավոր մարզիչ Ռուբեն Ամորիմից։ 40-ամյա պորտուգալացի մասնագետը լքեց ակումբը 14 ամիս աշխատանքից հետո․ որոշումն ուժի մեջ մտավ անմիջապես։ Անգլիական աղբյուրների փոխանցմամբ՝ հրաժարականի պատճառը մարզչի և ակումբի ղեկավարության միջև հարաբերությունների լուրջ ճգնաժամն էր։

Ամորիմի վերջին հանդիպումը «կարմիր սատանաների» ղեկին ավարտվեց 1:1 հաշվով ոչ-ոքի՝ «Լիդս Յունայթեդ»-ի դեմ կիրակի օրը։ Պրեմիեր լիգայի 20 տուրերից հետո մանչեսթերյան ակումբը զբաղեցնում է ընդամենը վեցերորդ հորիզոնականը, ինչը չի համապատասխանում ակումբի հավակնություններին։

«Լիդս»-ի հետ խաղից հետո Ամորիմը փաստացի բացահայտեց հակասությունների խորությունը «ՄՅ»-ի ղեկավարության հետ.

«Ես եկել էի “Մանչեսթեր Յունայթեդ”՝ լինելու մենեջեր, ոչ թե պարզապես մարզիչ։ Չեմ ցանկանում խոսել տրանսֆերային բյուջեի մասին, բայց իրավիճակը բացասական է։ Թվում է՝ ղեկավարությունը չի ցանկանում ձեռք բերել բարձր մակարդակի ֆուտբոլիստներ», — հայտարարել է պորտուգալացին։

Մինչև մրցաշրջանի ավարտը թիմը կգլխավորի 41-ամյա Դարեն Ֆլետչերը։ «Յունայթեդ»-ի նախկին կիսապաշտպանը, ով հանդես է եկել ակումբում 2002-ից 2015 թվականներին, վերջին շրջանում աշխատում էր մինչև 18 տարեկանների թիմի հետ։ Նրա դեբյուտը գլխավոր մարզչի պարտականությունները կատարողի դերում սպասվում է արդեն չորեքշաբթի՝ «Բերնլի»-ի դեմ արտագնա խաղում։ Մշտական մարզչի նշանակումը, ամենայն հավանականությամբ, հետաձգվել է մինչև ամառ։

Ամորիմի պաշտոնանկությունը դարձավ արդեն երկրորդ բարձրաձայն մարզչական փոփոխությունը Պրեմիեր լիգայում 2026 թվականի սկզբից։ Ավելի վաղ լոնդոնյան «Չելսին» հեռացրել էր Էնցո Մարեսկային, ինչը ընդգծում է Անգլիայի առաջնության առաջատար ակումբներում աճող լարվածությունը՝ անկայուն արդյունքների ֆոնին։