«Մանչեսթեր Սիթին» սենսացիոն պարտություն կրեց «Բուդյո/Գլիմտ»-ից Նորվեգիայում

Նորվեգական «Բուդյո/Գլիմտ»-ը պատմական հաղթանակ տարավ «Մանչեսթեր Սիթի»-ի նկատմամբ Չեմպիոնների լիգայի 2025/26 մրցաշրջանի լիգային փուլի խաղում։ Արկտիկական Բուդյո քաղաքում կայացած հանդիպումն ավարտվեց դաշտի տերերի հաղթանակով՝ 3:1 հաշվով։

Կյետիլ Կնուցենի սաները խաղը սկսեցին բարձր ինտենսիվությամբ և արդեն առաջին խաղակեսում երկու անգամ գրավեցին անգլիական գրանդի դարպասը։ Սկզբնական հատվածի գլխավոր հերոսը դարձավ Հյոգը, որը 22-րդ և 24-րդ րոպեներին ձևակերպեց արագ դուբլ։

Երկրորդ խաղակեսում «Բուդյո/Գլիմտ»-ը շարունակեց պարտադրել իր խաղաոճը մրցակցին, իսկ 58-րդ րոպեին Հաուգեն գեղեցիկ հարվածով հաշիվը դարձրեց 3:0։ «Մանչեսթեր Սիթին» արագ պատասխանեց․ արդեն երկու րոպե անց Շերկին կրճատեց հաշվի տարբերությունը, սակայն դրանից ավելին հյուրերին չհաջողվեց։

Պեպ Գվարդիոլայի թիմի համար լրացուցիչ խնդիրներ առաջացան 62-րդ րոպեին, երբ Ռոդրին ստացավ երկրորդ դեղին քարտը և հեռացվեց խաղադաշտից։

Այս հաղթանակը դարձավ «Բուդյո/Գլիմտ»-ի առաջինը ընթացիկ լիգային փուլում և կարող է վճռորոշ դեր խաղալ նորվեգական ակումբի համար փլեյ-օֆֆ դուրս գալու պայքարում։ Բացի այդ, արդյունքը մտավ պատմության մեջ․ 3:1 հաշվով հաղթանակը կրկնեց նորվեգական թիմերի ամենախոշոր հաղթանակը անգլիական ակումբների նկատմամբ եվրագավաթներում․ նախկինում նման արդյունքի հասել էր միայն «Վիկինգ»-ը՝ «Չելսի»-ի դեմ ՈՒԵՖԱ-ի գավաթի 2002/03 մրցաշրջանում։

Չեմպիոնների լիգա, լիգային փուլ
«Բուդյո/Գլիմտ» — «Մանչեսթեր Սիթի» — 3:1
Գոլեր․ Հյոգ, 22, 24; Հաուգե, 58 — Շերկի, 60
Հեռացում․ Ռոդրի, 62 («Մանչեսթեր Սիթի»)

Օրվա մեկ այլ վաղ խաղում Չեմպիոնների լիգայում «Բրյուգգեն» արտագնա խաղում ջախջախեց «Կայրաթ»-ին՝ 4:1 հաշվով։

Երեքշաբթիի մնացած հանդիպումները մեկնարկեցին Մոսկվայի ժամանակով 23:00-ին։