Մաքսիմո Գարսիա Սելառայան. «Ներկայացնել Հայաստանը՝ պատիվ է։ Բաց եմ նման հնարավորության համար»

20-ամյա արգենտինացի կենտրոնական պաշտպան Մաքսիմո Գարսիա Սելառայանը հայտարարել է, որ պատրաստ է խաղալ Հայաստանի ազգային հավաքականի կազմում, եթե նման հնարավորություն ստանա։

AFS_scout սկաուտական հարթակին տված հարցազրույցում ֆուտբոլիստը նշել է․
«Ես հայկական արմատներ ունեմ, իմ երկրորդ ազգանունը Սելառայան է, սակայն հայկական քաղաքացիություն չունեմ։ Եթե նման հնարավորություն լինի, մեծ հպարտությամբ կներկայացնեմ Հայաստանը»։

Մաքսիմո Գարսիա Սելառայանը ծնվել է Արգենտինայի ամենահարավային մասում՝ Ռիո Գրանդե քաղաքում, որը տեղակայված է Հրե լեռների կղզեխմբում՝ Անտարկտիդայից ոչ հեռու։ Նա սան է «Սարմյենտո» ակադեմիայի և 2024 թվականից հանդես է գալիս արգենտինական «Բարրակաս Սենտրալ» ակումբում՝ մասնակցելով 12 հանդիպման ակումբի պահեստային թիմի կազմում՝ տեղական լիգայում։

Հետաքրքիր է, որ նույն լիգայում հանդես է գալիս նաև Գոնսալո Սելառայանը («Բելգրանո II»), ով Հայաստանի ազգային թիմի աստղ Լուկաս Սելառայանի եղբորորդին է։ Գոնսալոն հրավեր էր ստացել Հայաստանի երիտասարդական հավաքական, սակայն վնասվածքի պատճառով չի կարողացել միանալ թիմին։ Չնայած Սելառայան ազգանվանը, Մաքսիմոյի և Լուկասի միջև հարազատական կապ հաստատված չէ։

Հայտնի է, որ Արգենտինայում ապրում են Կիլիկյան Հայաստանից գաղթած բազմաթիվ հայերի սերունդներ, որոնք կրում են Սելառայան ազնվական տոհմի ազգանունը և պահպանել են իրենց նախնիների հիշողությունը։

Մաքսիմոն հպարտություն է իր ծննդավայր Ռիո Գրանդեի համար, որտեղ շատ քիչ պրոֆեսիոնալ ֆուտբոլիստներ կան։ 2021 թվականին նա ներկայացրել է Հրե Լեռները Իտալիայում անցկացվող մինի ֆուտբոլի միջազգային մրցաշարում։