Դահուկորդ Միքայելյան. «Ինձ համար արժանապատվությունն ու իմ Հայրենիքը՝ ամեն ինչից վեր են»

Հայ դահուկորդ Միքայել Միքայելյանը հայտնվել է ուշադրության կենտրոնում Իտալիայում անցկացված հեղինակավոր բազմօրյա մրցաշարի՝ Tour de Ski-ի հերթական փուլից հետո։ Քննարկումների պատճառ է դարձել մարզիկի նկատմամբ կիրառված տուգանքը՝ մրցումների պաշտոնական հովանավորի՝ Ադրբեջանի լոգոտիպը թաքցնելու համար։

«Ազատություն ռադիոկայանի» հայկական ծառայությանը տված հարցազրույցում 26-ամյա դահուկորդը նշել է, որ մեկնարկային համազգեստը ստացել է մրցումից ընդամենը մի քանի ժամ առաջ և միայն մեկնարկից առաջ է նկատել երկրանվան գրությունը։ Միքայելյանի խոսքով՝ նա գիտակցաբար որոշել է չմասնակցել մրցմանը այդ լոգոտիպով և այն փակել է՝ հասկանալով հնարավոր հետևանքները։

«Ես փակեցի գրությունը և դուրս եկա մեկնարկի։ Ինձ համար արժանապատվությունն ու իմ Հայրենիքը՝ ամեն ինչից վեր են։ Ժյուրին դա նկատեց մրցումներից հետո։ Ես բացատրեցի պատճառը, նրանք ասացին, որ հասկանում են, բայց Միջազգային ֆեդերացիայի կանոնների համաձայն բոլոր հովանավորները պետք է տեսանելի լինեն», — ասել է Միքայել Միքայելյանը «Ազատություն ռադիոկայանին» տված հարցազրույցում։

Մարզիկը ընդգծել է, որ գիտակցում է Դահուկասպորտի և սնոուբորդի միջազգային ֆեդերացիայի (FIS) կանոնակարգի պահանջները, որոնց համաձայն բոլոր պաշտոնական հովանավորները պետք է տեսանելի ներկայացված լինեն մասնակիցների մարզահագուստի վրա։ Մրցման ավարտից հետո ժյուրին արձանագրել է խախտումը և նշանակել տուգանք։ Միքայելյանի խոսքով՝ մրցավարները իրավիճակին մոտեցել են ըմբռնումով, սակայն հիշեցրել են կանոնների պահպանման անհրաժեշտության մասին։

Միքայելյանը նաև նշել է, որ թեև սպորտը իդեալական դեպքում պետք է լինի քաղաքականությունից դուրս, նա չի կարող անտեսել սեփական սկզբունքներն ու իր երկրի անվտանգության և արժանապատվության հետ կապված հարցերը։ Նրա խոսքով՝ ապագայում ևս նա պատրաստ չէ դուրս գալ մեկնարկի նման խորհրդանշաններով։

Հայաստանի դահուկասպորտի ֆեդերացիայում հաստատել են, որ կրկնակի խախտման դեպքում հնարավոր է ավելի խոշոր տուգանք, սակայն խոսք չի գնում որակազրկման մասին։ Ֆեդերացիայի նախագահ Գագիկ Սարգսյանը Facebook-ում հրապարակված տեսաուղերձում հայտարարել է, որ կազմակերպությունը աջակցում է մարզիկի որոշմանը և պատրաստ է իր վրա վերցնել տուգանքի վճարումը։

Հիշեցնենք, որ ավելի վաղ FIS-ը հինգ տարվա համաձայնագիր է կնքել Ադրբեջանի պետական զբոսաշրջության գործակալության հետ, որի շրջանակում երկրի անվանումը տեղադրվում է մի շարք միջազգային մրցաշարերի մասնակիցների մարզահագուստի վրա։ Միքայելյանի մասնակցությամբ պատմությունը կրկին բարձրացրել է հարցը՝ որտեղ են անցնում սպորտի, մարզիկների անձնական դիրքորոշման և միջազգային ֆեդերացիաների առևտրային պարտավորությունների սահմանները։