Հայաստանից լեգեոներները ավարտեցին մասնակցությունը ԱԱԳ-2025-ին, Ալժիրն ու Կոտ դ’Իվուարը դուրս եկան քառորդ եզրափակիչ

Հունվարի 6-ին կայացան Աֆրիկայի ազգերի գավաթի 2025 թվականի մրցաշարի 1/8 եզրափակիչ փուլի վերջին հանդիպումները։ Դրանց արդյունքներով քառորդ եզրափակիչ դուրս եկան Ալժիրի և Կոտ դ’Իվուարի հավաքականները, մինչդեռ Հայաստանի առաջնությունում հանդես եկող ֆուտբոլիստներ ունեցող թիմերը ավարտեցին իրենց մասնակցությունը մրցաշարին։

Կոնգոյի Դեմոկրատական Հանրապետության հավաքականը, որի կազմում է «Նոա» ակումբի դարպասապահ Տիմոթի Ֆայուլուն, 0:1 հաշվով պարտվեց Ալժիրին։ Միակ գոլը խփվեց լրացուցիչ ժամանակի 119-րդ րոպեին․ փոխարինման դուրս եկած Ադիլ Բուլբինան («Ալ-Դուհայլ», Քաթար) դարձավ գոլի հեղինակ։

Ֆայուլուն մրցաշարի ընթացքում դաշտ դուրս չեկավ։ Քննարկվում էր նրա խաղադաշտ դուրս գալու տարբերակը հատուկ հետխաղյա 11-մետրանոց հարվածաշարի համար՝ Նիգերիայի դեմ աշխարհի առաջնության ընտրական խաղի օրինակով, որտեղ նա հետ մղեց երկու հարված և օգնեց թիմին անցնել հաջորդ փուլ։ Սակայն այս անգամ «ընձառյուծները» չհասցրին դիմանալ մինչև հետխաղյա հարվածաշար՝ բաց թողնելով գոլը լրացուցիչ ժամանակի ավարտից մեկ րոպե առաջ։

Աֆրիկայի գավաթ-2025-ը լքում է նաև հայկական «Նոա» ակումբի կիսապաշտպան Գուստավո Սանգարեն, որը Բուրկինա Ֆասոյի հավաքականի կազմում անցկացրել է երկու հանդիպում․

• 70 րոպե՝ Էկվատորիալ Գվինեայի դեմ (2:1 հաղթանակ, SofaScore՝ 7.1),

• 78 րոպե՝ Ալժիրի դեմ (0:1 պարտություն, SofaScore՝ 7.2)։

Կոտ դ’Իվուարի դեմ 1/8 եզրափակիչ խաղում Սանգարեն մասնակցություն չունեցավ, իսկ Բուրկինա Ֆասոյի հավաքականը խոշոր հաշվով պարտվեց՝ 0:3։ Գոլերը խփեցին Ամադ Դիալլոն («Մանչեսթեր Յունայթեդ»), Բազումանա Տուրեն («Հոֆենհայմ») և Յան Դիոմանդեն («Լայպցիգ»)։

Ավելի վաղ՝ խմբային փուլի ընթացքում, մրցաշարը լքել էր նաև Կոմորյան կղզիների հավաքականը, որի կազմում հանդես է գալիս Երևանի «Արարատ» ակումբի դարպասապահ Ադել Անզիմատ-Աբուդուն։

Այսպիսով, Հայաստանի առաջնության ներկայացուցիչները ավարտեցին իրենց ելույթները ԱԱԳ-2025-ում, իսկ պայքարը գավաթի համար շարունակվում է առանց նրանց մասնակցության։

Աֆրիկայի ազգերի գավաթ-2025-ի քառորդ եզրափակիչ զույգերը.

• Մալի — Սենեգալ (հունվարի 9)

• Կամերուն — Մարոկկո (հունվարի 9)

• Եգիպտոս — Կոտ դ’Իվուար (հունվարի 10)

• Ալժիր — Նիգերիա (հունվարի 10)