«Քյոլնը» շարունակում է վճարել Սարգիս Ադամյանին միլիոնանոց աշխատավարձ և պատրաստ է բաժանվել նրանից ձմռանը

Հայ հարձակվող Սարգիս Ադամյանը անսպասելիորեն հայտնվել է Գերմանիայում ֆինանսական ու կադրային պարադոքսի կենտրոնում։ Չնայած նրան, որ 32-ամյա ֆուտբոլիստը չի մտնում «Քյոլնի» առաջին թիմի ծրագրերի մեջ, ակումբը շարունակում է վճարել նրան Բունդեսլիգայի մակարդակին համապատասխան ամբողջական աշխատավարձ՝ ամսական մոտ 100 հազար եվրո։

Ներկայումս Ադամյանը հանդես է գալիս U21 թիմում՝ Ռեգիոնալլիգա Արևմուտքում, որտեղ, սակայն, բավական համոզիչ է խաղում։ Հայ հարձակվողի ակտիվում արդեն կա վեց գոլ, իսկ նրա ներդրումը օգնել է «այծերի» երիտասարդական թիմին հաղթահարել մրցաշրջանի սկզբում առաջացած ճգնաժամը և ամրապնդվել մրցաշարային աղյուսակի վերին հատվածում։

Անցյալի պայմանագիր և թանկարժեք սխալ
Խնդրի արմատը պայմանագիրն է, որը ստորագրվել է դեռևս 2021 թվականի ամռանը, երբ Ադամյանը «Հոֆենհայմից» տեղափոխվեց «Քյոլն»։ Այդ ժամանակվա ղեկավարությունը նրան ներառել էր բարձր աշխատավարձային կատեգորիայի մեջ՝ ակնկալելով առանցքային խաղացողի դեր։ Այժմ ֆուտբոլիստը աշխատում է պայմանագրի վերջին տարին՝ մնալով ամենաբարձր վարձատրվող խաղացողներից մեկը… Ռեգիոնալլիգայում։

Անցած ամռանը ակումբը փորձեց վաղաժամ խզել պայմանագիրը, սակայն կողմերը չկարողացան համաձայնության գալ։ Ադամյանը պատրաստ էր հեռանալ միայն այն դեպքում, եթե ստանար մնացած աշխատավարձի զգալի մասը որպես փոխհատուցում։

Ղեկավարության կոշտ դիրքորոշումը
«Քյոլնի» գործադիր տնօրեն Ֆիլիպ Տյուրոֆը հասկացրեց, որ ակումբը գիտակցաբար հրաժարվել է նման սցենարից։ Նրա խոսքով՝ պայմանագիրը պահպանելու և խաղացողին U21 ուղարկելու որոշումը սկզբունքային է։

Ակումբի ղեկավարությունը չցանկացավ կրկին ստեղծել նախադեպ, երբ ֆուտբոլիստներին վճարվում են միլիոնավոր եվրոներ՝ պարզապես աշխատավարձային բեռից ազատվելու համար։ Ուղերձը հստակ է. եթե խաղացողը ցանկանում է հեռանալ, պետք է պատրաստ լինի ֆինանսական զիջումների։ Հակառակ դեպքում նրան կարող են սպասել տրիբունան կամ երիտասարդական թիմը՝ շուկայական արժեքի համապատասխան հետևանքներով։

Ադամյանի պրոֆեսիոնալիզմը և անորոշ ապագան
Չնայած իրավիճակին՝ Ադամյանը դրսևորել է պրոֆեսիոնալ մոտեցում։ Նա ընդունել է նոր դերը և դարձել U21 թիմի հարձակման առաջատարներից մեկը։ Թիմի գլխավոր մարզիչ Եվանգելոս Սբոնիասը նշել է, որ հարձակվողը լրջորեն է վերաբերվում մարզումներին և իրականում օգնում է թիմին, հատկապես հարձակման գծում խաղացողների սահմանափակ ընտրության պայմաններում։

Այնուամենայնիվ, Ադամյանի հեռանկարները ակումբում մնում են մշուշոտ։ Ամռանը նա, ամենայն հավանականությամբ, կհեռանա «Քյոլնից», իսկ արդեն ձմռանը հնարավոր է տրանսֆեր։ Մրցաշրջանի երկրորդ հատվածում ակումբը նախատեսում է ավելի ակտիվ ներգրավել երիտասարդ հարձակվողներին՝ Մալիկ Էլ Մալուին և Ֆին Շենտենին, ինչի հետևանքով նույնիսկ U21-ում հայ հարձակվողին կարող է սպասել պահեստայինների նստարանը։

Այսպիսով, ձմեռային տրանսֆերային պատուհանը կարող է դառնալ Սարգիս Ադամյանի վերջին հնարավորությունը վերջնականապես փակելու «Քյոլնում» ձգձգված և անհաջող գլուխը, որը տևել է երեք ու կես տարի։

Աղբյուր՝ Geissblog