«Կրասնոդարը» հաղթեց «Ռոստովին» ՌՊԼ-ի 19-րդ տուրում․ Սպերցյանը գոլի հեղինակ դարձավ

«Կրասնոդարը» հաղթանակով մեկնարկեց 2026 թվականի պաշտոնական հատվածը։ Ռուսաստանի Պրեմիեր Լիգայի 19-րդ տուրի խաղում «ցլերը» սեփական հարկի տակ 2:1 հաշվով հաղթեցին «Ռոստովին» և պահպանեցին առաջատարի դիրքը մրցաշարային աղյուսակում։

Հանդիպման հաշիվը բացվեց արդեն 8-րդ րոպեին։ Հայաստանի ազգային հավաքականի ավագ Էդուարդ Սպերցյանը վաստակեց 11-մետրանոց հարված և ինքն էլ վստահորեն իրացրեց այն՝ առաջ մղելով տանտերերին։ Առաջին խաղակեսի վերջնամասում «Ռոստովը» կարողացավ հավասարեցնել հաշիվը․ նշանակված 11-մետրանոցը գոլի վերածեց Ալեքսեյ Միրոնովը։

Երկրորդ խաղակեսում ռոստովցիները հայտնվեցին բարդ իրավիճակում․ 51-րդ րոպեին պաշտպան Չիստյակովը ստացավ ուղիղ կարմիր քարտ՝ իր թիմին թողնելով փոքրամասնությունում։ Թվային առավելությունը «Կրասնոդարը» օգտագործեց 73-րդ րոպեին․ հաղթական գոլը խփեց Նիկիտա Կრივցովը։ Ավելացված ժամանակում՝ 95-րդ րոպեին, «Ռոստովը» մնաց ինը խաղացողներով՝ Վախանիայի հեռացումից հետո։

Էդուարդ Սպերցյանը խաղադաշտում անցկացրեց ամբողջ 90 րոպեն և դարձավ հանդիպման լավագույն խաղացողներից մեկը։ «Ռոստովի» կիսապաշտպան Խորեն Բայրամյանը խաղադաշտ դուրս եկավ 83-րդ րոպեին։

Էդուարդ Սպերցյանի վիճակագրությունը

• Հարվածներ՝ 4 (2-ը՝ դարպասին)

• Սրող փոխանցումներ՝ 3

• Ճշգրիտ փոխանցումներ՝ 26 (74%)

• Հաջող դրիբլինգ՝ 2/3

• Վաստակած 11-մետրանոց՝ 1

• Գնդակի կորուստներ՝ 18

• Խլումներ՝ 3

• Հաղթած մենամարտեր՝ 6/12

• Օդային մենամարտեր՝ 3/4

• SofaScore գնահատական՝ 8.3

19 տուրերից հետո «Կրասնոդարը» շարունակում է գլխավորել ՌՊԼ-ի մրցաշարային աղյուսակը՝ ամրապնդելով իր դիրքերը չեմպիոնական պայքարում։